विराटनगर, भाद्र २९
डेंगुको प्रकोप नियन्त्रणका लागि विराटनगर महानगर “सर्च एण्ड डिस्ट्रोइ” अभियानमा जुटेको छ । सो अभियान अन्तर्गत डेंगुका संक्रमित लामखुट्टेलाई महानगरले खोजी खोजी नष्ट गर्ने बताइएको छ ।
शनिबारबाट विद्यालय र सरकारी कार्यालयहरूमा लामखुट्टेलाई नियन्त्रण गर्न ‘फगिङ’ अर्थात् कीटनाशक रसायन धुँवा उडाएर मार्ने कार्यको थालनी भएको छ । विराटनगर महानगरका मेयर भीम पराजुलीले आदर्श माध्यमिक विद्यालयमा फगिङ गर्दै डंगु नियन्त्रण अभियान सुरु गरेका थिए । यसभन्दा अगाडि बस्तीहरूमा मात्र फगिङ गरिएको थियो ।
महानगरले यसपटक विद्यालय र सरकारी कार्यालय हाताभित्र फगर मेसिनबाट यो अभियान सुरु गरेको छ । शनिबारमात्रै वडा नम्बर ७ र १० का सरकारी, गैरसरकारी कार्यालय, सामुदायिक विद्यालय, निजी विद्यालयहरूमा फगर मेसिनबाट लामखुट्टे मार्ने काम भएको छ । यो अभियान महानगरका १९ वटै वडामा क्रमशः सञ्चालन गर्ने बताइएको छ ।
केही महिनाअघिबाट डेंगुबाट संक्रमित बिरामीको संख्या विराटनगरमा पनि बढेकाले नियन्त्रणको लागी महानगरले उक्त अभियान संचालन गरेको बताएको छ ।
