काठमाडाैं, भदाै २ । मकवानपुरको भीमफेदी गाउँपालिका-६ जुरीखेतमा मंगलबार बिहान भएको स्कार्पियो दुर्घटनामा उच्च अदालत वीरगञ्जका मुख्य न्यायाधीश गोकर्ण डाँगीलगायत ६ जना घाइते भएका छन्। काठमाडौंबाट वीरगञ्जतर्फ आउँदै गरेको सवारी सडकबाट लगभग ५०–६० मिटर तल खोल्सामा खस्दा यो दुर्घटना भएको हो।
घाइतेमध्ये एक महिलाको अवस्था गम्भीर रहेको छ भने बाँकी पाँच जनाको अवस्था मध्यम रहेको प्रहरीले जनाएको छ। सबैलाई उपचारका लागि नजिकैको भीमफेदी अस्पताल पुर्याइएको छ, र थप उपचारका लागि ठूला अस्पताल लैजाने तयारी भइरहेको छ।
घटनाको जानकारी पाएपछि स्थानीय प्रहरी टोली र जिल्ला प्रहरी कार्यालयका अधिकारीहरू तत्काल घटनास्थल पुगेका थिए। दुर्घटनाग्रस्त गाडी हाल घटनास्थलमै रहेको छ, तर सडकमा सवारी आवागमन भने सामान्य रूपमा चलिरहेको प्रहरीले बताएको छ।
