भौतिक पूर्वाधारलाई १ खर्ब ४८ अर्बको सिलिङ

काठमाडौं , चैत ४
भौतिक पूर्वाधार तथा यातायात मन्त्रालयले आगामी आर्थिक वर्ष २०७८÷७९ का लागि १ खर्ब ४८ अर्ब बराबरको बजेट सिलिङ पाएको छ । योजना आयोगले यसै हप्ता मन्त्रालयलाई आगामी वर्षहरुको लागि बजेट सिलिङ पठाएको हो ।
मन्त्रालय स्रोतका अनुसार आर्थिक वर्ष २०७८÷७९ मा आगामी वर्ष सडक विभागका लागि १ खर्ब १६ अर्ब बराबरको सिलिङ दिइएको छ । पूर्व–पश्चिम राजमार्गको विस्तार र मध्यपहाडी, मदनभण्डारी, हुलाकी र उत्तरदक्षिण कोरिडोर राजमार्गहरुको निर्माणमा नै आगामी वर्षको बजेट केन्द्रित हुने मन्त्रालयका एक अधिकारीले बताएका छन् ।
त्यस्तै आगामी वर्षबाट सिद्धबाबासहित केही ठाउँमा सुरुङमार्ग निर्माण ,मुग्लिन–नागढुंगा सडक विस्तार गर्ने लगायतका परियोजना रहेको बताएका छन् । साथै आगामी वर्ष रेल विभागले पनि करिब २५ अर्बभन्दा बढीको बजेट पाउने देखिएको छ । पूर्व–पश्चिम रेलमार्गको झापा–सुनसरी खण्डको निर्माणका काम पनि आगामी वर्षबाट सुरु गर्ने तयारी रहेको मन्त्रालयका स्रोतले बताएका छन् ।