काठमाडौं , चैत्र २४
काठमाडौं विश्वकै वायु प्रदूषित शहरको सूचीमा परेको छ । काठमाडौं शहरको वायु प्रदूषण ३०९ एक्युआई मापन भएको छ । जुन स्वास्थ्यका लागि अत्याधिक हानिकारक रहेको छ । वायु प्रदूषण १ सय भन्दा बढी एक्युआई मापन भए स्वास्थ्यकाे लागी हानिकारक मानिन्छ ।
यस्तै‚ चितवनको सौरहा र कैलालीको धनगढीमा पनि वायुको गुणस्तर ३०० भन्दामाथि रहेको छ । काठमाडौंमा लगायतका क्षेत्रमा तुवाँलेले ढाकेको छ । घाम लाग्न सकेको छैन । यसअघि पनी करिब एक सातासम्म तुवाँलोले आकाश ढाकेको थियो ।
तुवाँलो लाग्नुको प्रमुख कारण देशका विभिन्न भेगमा लागिरहेका डढेलो रहेको जल तथा मौसम विज्ञान विभागले बताएको छ । वन तथा भू–संरक्षण विभागको वन डढेलो पहिचान तथा अनुगमन प्रणालीका अनुसार विगत २४ घण्टायता देशका ७०० भन्दा बढी स्थानमा डढेलो र आगलागी भएका छन् ।
