बिराटनगर, जेष्ठ १०
निरज बस्नेत
बिराटनगर महानगरपालिकामा महिलामैत्री शौचालयको अभाव छ । बिराटनगरको मुटुमा रहेको ट्राफिक चौकमा दुर्गन्धित सार्वजनिक शौचालय छ, जहाँ महिलालाई शौच गर्न असहज हुन्छ । दिसा पिसाब गरेको समेत महानगरपालिकाले शूल्क उठाउँछ ।
नागरिकसँग कर उठाउन कुनै ठाउँ स्थानीय सरकारले छोडेको छैन । पूरानो गुद्री बजारमा छिर्ने बितिकै ह्रवास्स गन्हाउँने अर्को पब्लिक ट्वाईलेट छ । यसमा त छरपष्ट गु को भण्डार छ । कोहि छिर्नासाथ गु मै चिप्लेर लड्छ ।
बिराटनगर बसपार्कमा अव्यवस्थित सार्वजनिक चर्पी छ, जहाँ पस्न कुनै युद्ध जिते बराबर हुन्छ । बिराटनगरको हाटखोलामा चाहीँ राम्रै पब्लिक रेष्ट रुम रहेको छ । यसको तारिफ गर्नुपर्ने हुन्छ । यो चाहीँ महिलामैत्री भन्नुपर्छ ।
बिराटनगर महानगरपालिकाको नगर उपप्रमुख भएर नेकपा एमालेकी शिल्पा कार्की आएकी छिन् । अब यो मामलामा शिल्पाको ध्यान जानै पर्दछ । महिला भएको आधारमा समेत उनको यसतर्फ क्विक रेस्पोन्स देखिनैपर्दछ । प्रदेश १ को राजधानी एवं यसै प्रदेशको एक मात्र महानगरपालिका बिराटनगरमा महिलामैत्री शौचालय निर्माण नहुनु लज्जाको बिषय हो । जनतासँग शौच गरेको समेत शूल्क उठाउन अबिलम्व बन्द गरिनुपर्दछ ।
