विराटनगर, माघ ४
माघ ६ गतेबाट विराटनगरको शहिद रङगशालाको खेलमैदानमा प्याब्सन स्पोर्टस मिट हुने भएको छ । निजी तथा आवासीय विद्यालय अर्गनाईजेसन नेपाल प्याब्सन मोरङले मंगलबार पत्रकार सम्मेलनको आयोजना गरी सो स्पोर्टस मिट सम्बन्धमा जानकारी गराएको हो ।
कोरोना कहरका कारण २ बर्ष स्थगित भएको प्याब्सन स्पोर्टस मिट यसपटक पुनः संचालनमा ल्याउन लागिएको बताईएको छ ।
तीन दिनसम्म हुने मिटका खेल प्रतियोगिताहरुमा दुई सय २० वटा प्याब्सन सदस्य विद्यालयहरु मध्ये बाट ३ हजार जना भन्दा बढी खेलाडीहरु सहभागी हुने जिल्ला अक्ष्यक्ष सितला सुब्बाले जानकारी गराइन् । स्पोर्ट्स मिटमा फुटबल, भलिबल, टेबलटेनिस, बास्केटबल, एथलेटिक्स, म्याराथुन, सटपुट, थ्रिपल जम, हाइजम, लङजम, दौडलगायतका खेलहरू खेलाईने बताईएको छ ।
स्पोर्टस मिटका खेलहरु एक लाखभन्दा बढी शिक्षक, विद्यार्थी, अभिभावक तथा खेल प्रेमीहरुले प्रत्यक्ष अवलोकन गर्ने समेत अनुमान गरिएको छ । स्पोर्टस मिटको उद्धघाटन प्रदेश नं. १ का मुख्य मन्त्री हिक्मतकुमार कार्कीबाट गराउने तयारी छ । उक्त कार्यक्रम अयोजना गर्न कुल १५ लाख खर्च लाग्ने इस्टिमेट गरिएको छ ।
