बर्जु
कोशी प्रदेश सरकारको पर्यटन, वन तथा वातावरण मन्त्रालयले पर्यटन प्रर्वद्धनका लागि विराट राजाको दरबारको क्षेत्रदेखि बर्जु तालसम्म दौड (हाफ म्याराथन) प्रतियोगिता आयोजना गर्ने भएको छ । जेठ ६ गते शनिवार बिहान ६ बजे साे हाफ म्याराथन प्रतियोगिता हुने जानकारी प्राप्त भएको छ ।
सो म्याराथन गरी मोरङको विराटनगर १८ स्थित भेडियारीमा रहेको विराट राजाको दरवार र सुनसरीको बर्जु पालिकामा रहेको ऐतिहासिक बर्जु ताललाई चिनाउने मुख्य उदेश्य रहेको छ । सो म्याराथनलाई सफल बनाउन बर्जु गाँउपालिकाका अध्यक्ष जिबछ कुमार राय र समग्र गाँपाका जनप्रतिनिधिका टोली अहोरात्र खटीरहेका छन् । उनले एक एक समाजका नागरिक, विभिन्न संघसंस्थाका प्रतिनिधि एवं संचारकर्मीसँग म्यारथनलाई कसरी सफल बनाउने विषय दैनिक छलफल चलाईरहेका छन् । गाँपा अध्यक्ष रायले आफ्नो क्षेत्रमा रहेको ऐतिहासिक सम्पदाको प्रवद्र्धन गर्न आफु सदैव तत्पर रहेको प्रतिक्रिया समेत दिएका छन् ।
उता मुल आयोजक कोशी प्रदेश सरकारको पर्यटन, वन तथा वातावरण मन्त्रालय भने सो म्याराथोनलाई सफल बनाउन खासै चिन्तित र जिम्मेवार भएको देखिदैन । प्रचारप्रसारको लागी मन्त्रालयले सोमबार आयोजना गरेको पत्रकार सम्मेलनबारे स्थानीय संचारमाध्यमलाई समेत सार्वजनिक सूचना नदिँदा प्रचारप्रसार प्रभावकारी ढंगले हुन सकेन । पहिलो गाँसमै ढुंगापरेपछि म्याराथन गराउने नाममा राज्यको सम्पत्ति त्यसै खेर जाने त हैन भन्ने विषयमा पत्रकार पंक्ति सशंकित छन् ।
आयोजक कोशी प्रदेश सरकारको पर्यटन, वन तथा वातावरण मन्त्रालयका मन्त्री जीवन आचार्य हुन् । उनी बाहलबाला प्रधानमन्त्री प्रचण्डका ज्वाइँ समेत हुन् ।
