विराटनगर, साउन ९
भन्सार एजेन्ट संघ, विराटनगरले गैर-एजेन्टलाई काम नदिन भन्दै उद्योगाैक तथा व्यापारीक संघसंस्थाहरु ज्ञापन पत्र बुझाएकाे छ । भन्सार एजेन्ट महासंघ नेपालका केन्द्रिय सदस्य प्रविण जोशी र विराटनगर भन्सार एजेन्ट संघका अध्यक्ष देवकीनन्दन शर्मा नेतृत्वको टोलीले सोमबार विभन्न उद्योगी तथा व्यापारीक संघसंस्थालाई ज्ञापन पत्र बुझाएका छन् ।
उक्त टाेलीले नेपाल उद्याेग परिसंघ केन्द्रिय उपाध्यक्ष तथा काेशीका अध्यक्ष भिम घिमिरे, एफएनसीसीआइका सदस्य एवं व्यापार संघ माेरङका अध्यक्ष नविन रिजाल र उद्याेग संगठन माेरङका अध्यक्ष राकेश सुरानासँग प्रत्यक्ष भेटघाट गरी ज्ञापन पत्र बुझाएका थिए ।
ज्ञापन पत्र बुझाउदै भन्सार एजेन्ट महासंघ नेपालका केन्द्रिय सदस्य प्रविण जोशीले अनाधिकृत रुपमा काेशी प्रदेशका विभन्न भन्सार कार्यालयमा गैरभन्सार एजेन्टको रुपमा आयात निर्यात सम्बन्धी काम गरिरहेकालाई प्रतिबन्ध लगाउन आग्रह गरे ।
विराटनगर भन्सार एजेन्ट संघका अनुसार विराटनगर भन्सार कार्यालयमा १३३ जना मात्र भन्सार एजेन्ट रहेका छन् । त्यस बाहेक १०० भन्दा बढि गैरभन्सार एजेन्टले भन्सार कार्यालय विराटनगरबाट अनाधिकृत रुपमा आयात निर्यातको काम गरिरहेको संघले जानकारी दिएकाे छ ।
