विराटनगर, कार्तिक २१
सुनसरी ईटहरीका पत्रकार पिबी दियालीले उपचारमा सहयोग गरि दिन याचना गरेका छन् ।
दुवै मृगौला फेल भएकोले पत्रकार पिबी दियालीले उपचारका लागि सरकार, समाजिक संघसँस्था र दयालु दाताहरुसँग सहयोगका लागि याचना गरेका हुन् ।
सुनसरीको ईटहरीमा बसेर २९ बर्षदेखी सक्रृय व्यावसायिक पत्रकारिता गर्दै आएका पत्रकार दियाली विश्वकर्माले आफनो दुबै मृगौला खराब भएको र उपचारका लागि आफुसँग आर्थिक हैसियत नभएकोले सहयोगका लागि अनुरोध गर्न बाध्य भएको बताए ।
आफु मृगौला रोगी भएकोले उपचारका लागि सहयोग गर्न पत्रकार महासंघ केन्द्रिय र प्रदेश समितिलाई अनुरोध गरिसकेको पत्रकार दियालीले बताए ।
पत्रकार दियाली उच्च रक्त्तचाप र मधुमेहका विरामी पनि हुन । लामो समय प्रेसर र डाइबेटिजको कडा औषधी सेवन गरेकै कारण आफनो मृगौला खराब भएको हुनसक्ने उनको भनाई छ ।
४८ बर्षिय पत्रकार दियाली ईटहरीबाट प्रकाशित गणराज्य साप्ताहिक र मकालु अनलाइनका प्रधानसम्पादक हुन् । उनले लामो समय धरानबाट प्रकाशित ब्लााष्ट दैनिकमा पत्रकारिता गरेका थिए । उनले ईटहरीमा गणराज्य दैनिकपनि प्रकाशन गरेका थिए ।
पत्रकार दियालीकाअनुसार उनी संकटकालको समयमा तीन महिना हिरासतमा परेका थिए । उनलाई ३ सय ३५ दिन नजरबन्दमा पनि राखिएको थियो ।
पत्रकार दियालीहाल नेपाल पत्रकार महासंघ कोशी प्रदेश समिति सदस्य तथा दलित विभाग संयोजक छन् । पत्रकार दियाली दलित हकहितका लागि सक्रृय रुपले लागिपर्दै आएका छन् । उनले सम्पत्तीका नाममा आफुसँग ईटहरीमा एउटा सानो घर मात्र भएको बताए । उनका श्रीमती र एक छोरा छन् । श्रीमती चिया नास्ता पसल सञ्चालन गर्दछिन् ।
