पन्जाव भारतका डाक्टर , सन्दिप
विराटनगर, पुष १८
गरे असम्भव के छ र ? अनि काम जस्तोसुकै होस् , लाज किन ? यही कुरालाई व्यवहारत लागू गरेका छन् , पन्जाव भारतका डाक्टर , सन्दिप सिंहले । चार विषयमा स्नातकोत्तर र कानूनमा पिएचडी गरेका सिंह अहिले , तरकारी बेच्ने काम गर्देछन् । ३९ बर्षीय डा. सिंह पन्जावी विश्वविधालय, पटियालामा एक अनुबन्धित प्रोफेसर रहिसकेका व्यक्ति हुन् । तर, समय परिस्थितीका कारण उनले आज जागिर छोडेर तरकारी बेचेर पैसा कमाउन थालेका छन् । जागिरबाट परिवारको खर्च धान्न मुस्किल परेकै कारण डा. सिंहले जे सुकै गर्न तयार भएका हुन् । डा. सिंह पन्जावी विश्वविधालयको कानुन विभागमा ११ बर्षसम्म करारमा प्राध्यापक थिए । पन्जावी पत्रकारिता र राजनीतिशास्त्रमा डिग्री पनि गरेका छन् । र आजसम्म पनि आफ्नो पढाइलाई निरन्तरता दिदै छन् । तलव कम, र अनियमित तलव दिने जस्ता कारण पनि यिनले विभिन्न अवरोधको सामना गर्नुपरेको तितो यथार्थ छ । फलस्वरुप, सवैकुरा छोडछाड गरी तरकारी बेच्न थालेका हुन् । आफ्नो तरकारी ठेला र त्यसमा पिएचडी सब्जीवाला बोर्ड लगाएर डा. सिंह हरेक दिन घर घरमा गएर तरकारी बेच्छन् । तरकारी बेचेर उनले अहिले जागिर खाएको बेलामा भन्दा बढी आम्दानी गरिरहेका छन् ।
