बर्जु, माघ २५
बर्जु गाउँपालिकाकी उपाध्यक्ष नितु चौधरीले आफ्नो र गापा अध्यक्ष विचको सम्बन्ध सुमधुर रहेको बताएकी छिन् । केही समयअघि कुनै एक स्थानीय संचारमाध्यममा आएको अध्यक्ष र उपाध्यक्षविचको मनमुटावको विषयमा कुनै सत्यता नरहेको चौधरीले बताएकी छिन् ।
बिहिबार उपाध्यक्ष चौधरीले गापामा पत्रकारसँग भेटघाट गरी सो स्पष्टोक्ती दिएकी हुन् । आफ्ना श्रीमान मार्फत मनलाग्दी विकास निर्माणका काम गराएर बिल पेस गरेको भन्ने आरोपमा समेत कुनै सत्यता नभएको चौधरीले बताईन् । अनियमित ढंगले कर्मचारीलाई हाजिर गराउदा शिक्षा शाखामा आफुले तालाबन्दी गरेको विषयलाई भष्ट्राचारसँग जोडेर आफुलाई बदनाम गराउन खोजेको भन्दै उपाध्यक्ष चौधरीले आपत्ती समेत जनाईन् ।
आफ्नो श्रीमानले वडा नम्बर ६ को नहर, वडा नम्बर १ को वडा कार्यालय र बर्जु तालमा माटो पुरेको भन्दै ४० लाखको बिलको भुक्तानी माग्दै पेस गरेका विषयमा समेत कुनै सत्यता नभएको उपाध्यक्ष चौधरीले ठोकुवा गरिन् । त्यस्तै अर्का प्रदिप चौधरीमार्फत वडा नम्बर ३ मा बाटो ढलाई गरेको भन्दै दशलाखको भुक्तानी माग्दै बिल पेस गरेका भन्ने कुरा पनि झुटो भएको उनले बताईन् ।
गापा अध्यक्ष जिवछ कुमार रायले समेत विज्ञप्ती जारी गरी अपूष्ट समाचार सम्प्रेषण नगर्न भन्दै संचारमाध्यमलाई अपिल गरेका छन् ।
