विराटनगर, पाैष ९ । बैंकिङ कसुर मुद्दामा विराटनगर-१२ का वडाध्यक्ष हिरालाल कामतलाई सोमबार अपराह्न प्रहरीले नियन्त्रणमा लिएको छ ।
मोरङ प्रहरीका प्रवक्ता डिएसपी बेदप्रसाद जोशीका अनुसार मंसिर २५ गते मोरङ अदालतबाट जारी भएको पक्राउ पूर्जीको आधारमा कामतलाई पक्राउ गरिएको हो । जहदा गाउँपालिका-३ का वडाध्यक्ष गुरुदयानन्द ठाकुरले दिएको जाहेरीमा कामतले दिएको ५ लाख रुपैयाँको चेक बाउन्स भएको उल्लेख छ । सोही जाहेरीका आधारमा कात्तिक महिनामा कामतविरुद्ध बैंकिङ कसुर मुद्दा दर्ता भएको थियो ।
जनता समाजवादी पार्टी (जसपा) बाट निर्वाचित वडाध्यक्ष कामतलाई उजुरी दिने ठाकुर पनि सोही पार्टीबाट निर्वाचित वडाध्यक्ष हुन् । प्रहरीले कामतलाई मंगलबार अदालतमा पेश गरी थप अनुसन्धान अगाडि बढाउने जनाएको छ ।
