काठमाडाैं, चैत ७ । माध्यमिक शिक्षा परीक्षा (एसईई) आज बिहीबारदेखि देशभर सुरु भएको छ। राष्ट्रिय परीक्षा बोर्डका अनुसार यस वर्ष पाँच लाख १४ हजार ७१ जना विद्यार्थीले परीक्षा दिँदैछन्, जुन गत वर्षको तुलनामा ४९ हजार बढी हो।
परीक्षा देशभरका २,०७९ केन्द्रमा बिहान ८ बजेदेखि सञ्चालन भइरहेको छ। आज पहिलो दिन अनिवार्य अङ्ग्रेजी, संस्कृत वेदविद्याश्रमतर्फ अनिवार्य संस्कृत र मदरसातर्फ अनिवार्य अरबी भाषाको परीक्षा भइरहेको छ।
परीक्षा नियन्त्रक नन्दलाल पौडेलका अनुसार, सबै केन्द्रहरूमा सुरक्षा व्यवस्था कडा बनाइएको छ। १५० जनासम्म परीक्षार्थी भएका केन्द्रमा एक सहायक केन्द्राध्यक्ष र प्रत्येक २० जना विद्यार्थीका लागि एक निरीक्षक खटाइएको छ।
यस वर्ष केन्द्रीय कारागार, दैलेखका दुई कारागार, भक्तपुरको बालसुधार गृह र कीर्तिपुरको सफलता एचआइभी शिक्षा सदनबाट समेत विद्यार्थीहरू परीक्षामा सहभागी हुँदैछन्। सबैभन्दा बढी काठमाडौँमा ३९,६०० र सबैभन्दा कम मनाङमा ४३ जना विद्यार्थी छन्।
परीक्षा चैत १९ गतेसम्म चल्नेछ र नतिजा असार ७ गतेभित्र सार्वजनिक गरिने छ। बोर्डले यस वर्ष उत्तीर्ण दर ७० प्रतिशत पुर्याउने लक्ष्य राखेको छ, जबकि गत वर्ष ४८ प्रतिशत मात्रै विद्यार्थी उत्तीर्ण भएका थिए।
