काठमाडाैं, वैशाख ९ । अन्तर्राष्ट्रिय बजारमा सुनको मूल्य अचानक बढेको छ। सोमबार अन्तर्राष्ट्रिय बजारमा सुनको मूल्य प्रतिऔंस ३४०० डलर माथि पुगेको थियो। मंगलबार बिहान यो मूल्य अझै बढेर ३४८० डलार हाराहारीमा पुगेको छ। गत हप्ताको तुलनामा सुनको मूल्य करिब ५ प्रतिशतले बढेको देखिन्छ।
नेपाली बजारमा सोमबार सुनको मूल्य प्रतितोला १ लाख ९१ हजार रुपैयाँमा कारोबार भएको थियो। मंगलबार नेपाली बजारमा सुनको मूल्य बढेर प्रतितोला १ लाख ९७ हजार ९ सय पुगेकाे छ । अन्तर्राष्ट्रिय बजारको प्रभावका कारण अझैपनि सुनकाे मुल्य उकालाे लाग्ने देखिन्छ ।
विदेशी मिडियाका अनुसार, अमेरिकी राष्ट्रपति डोनाल्ड ट्रम्पले अमेरिकी केन्द्रीय बैंक (फेडरल रिजर्भ) लाई दिएको धम्कीका कारण सुनको मूल्यमा अचानक वृद्धि भएको हो। ट्रम्पले शुक्रबार ट्रुथ सोसियलमा लेखेका थिए, “धेरैले ब्याजदरमा कटौतीको माग गरिरहेका छन्। अहिले ब्याजदर घटाउन नसकेमा अर्थतन्त्रमा मन्दी आउन सक्छ।” उनले फेडका अध्यक्ष जेरोम पावेललाई ब्याजदर तत्काल घटाउन निर्देशनात्मक शैलीमा भनेका थिए।
शुक्रबारदेखि आइतबारसम्म अन्तर्राष्ट्रिय बजार बन्द रहेकाले ट्रम्पको अभिव्यक्तिको प्रभाव सोमबारबाट एकैपटक देखिएको हो। ट्रम्पको हस्तक्षेपले केन्द्रीय बैंकका नीतिहरू अस्थिर हुने र यसले अर्थव्यवस्थामा नकारात्मक असर पार्ने चिन्ताले लगानीकर्ताहरू सुनतर्फ आकर्षित भएका छन्। यसको परिणामस्वरूप सुनको मूल्यमा उल्लेख्य वृद्धि भएको छ भने अमेरिकी सेयर बजारमा गिरावट आएको छ।
