विराटनगर, जेठ ४ । बिराटनगरस्थित कान्तिपुर कलेजले आइतबार सञ्चालन गरेको कक्षा ११ को प्रवेश परीक्षामा ठूलो संख्यामा विद्यार्थीहरू सहभागी भएका छन्। एसईई परीक्षाको नतिजा प्रकाशित भएलगत्तै भर्ना प्रक्रिया खुला गरिएको थियो।
प्रवेश परीक्षामा बिराटनगरका साथै आसपासका जिल्ला र विभिन्न प्रदेशबाट विद्यार्थीहरू सम्मिलित भएकाे कलेजले जनाएको छ। विद्यार्थीहरूको व्यापक सहभागिताले संस्थालाई उत्साहित बनाएको कलेजका प्रिन्सिपल भुवन नेपालले बताए।
“भर्खरै प्रवेश परीक्षा सम्पन्न भएको छ। यस शैक्षिक सत्रमा हामीले विभिन्न संकायमा जम्मा १,०२० विद्यार्थी भर्ना गर्ने लक्ष्य लिएका छौं। विज्ञान संकायमा ३४०, व्यवस्थापन संकायमा ४८० र होटल व्यवस्थापनमा २२० विद्यार्थी भर्ना हुनेछन्। यस वर्ष विगतको तुलनामा विद्यार्थीहरूको उपस्थिति उल्लेखनीय रह्यो। अभिभावक र विद्यार्थीहरूले हामीप्रति देखाएको विश्वासले हामीलाई अत्यन्तै उत्साहित बनाएको छ,” उनले थपे।
कलेजले प्रवेश परीक्षाको नतिजा एक दिनभित्रै सार्वजनिक गर्ने तयारी गरेको छ।
कोशी प्रदेशको प्रतिष्ठित शैक्षिक संस्थाका रूपमा परिचित कान्तिपुर कलेजमा विज्ञान, कम्प्युटर विज्ञान, व्यवस्थापन र होटल व्यवस्थापन जस्ता विषयहरू पढाइन्छ। संस्थाले गुणस्तरीय शिक्षामा जोड दिँदै आएको छ।
