काठमाडाै, भदाै ३ । नेपाली कांग्रेसभित्रको संस्थापन इतर समूह पार्टीको १५औं महाधिवेशनसम्बन्धी प्रक्रिया रोक्न सर्वोच्च अदालतको ढोका ढकढक्याउने तयारीमा छ। पार्टी नेतृत्वले आधिकारिकतासम्बन्धी विवाद अदालतमा टुंगो नलागीकनै महाधिवेशनको संशोधित तालिका सार्वजनिक गरेपछि यो समूह असन्तुष्ट भएको हो।
इतर समूहका प्रचार-प्रसार संयोजक मीन विश्वकर्माका अनुसार, मुद्दा अदालतमा विचाराधीन हुँदाहुँदै एकतर्फी रूपमा प्रक्रिया अघि बढाइनु उपयुक्त नभएको भन्दै आफूहरूको कानून तथा विधान समिति (नेता रमेश लेखकको नेतृत्वमा) चाँडै सर्वोच्च अदालतमा निवेदन दिने तयारीमा रहेको बताए। यसअघि नै इतर समूहका राष्ट्रिय भेला संयोजक डा. शशांक कोइरालाले महाधिवेशनसँग जोडिएका सबै गतिविधि तत्काल रोक्न र अदालतको अन्तिम फैसला नआएसम्म पार्टीको संगठनात्मक अवस्था यथावत् राख्न आग्रह गर्दै निर्वाचन आयोग र पार्टी नेतृत्वलाई पत्राचार गरिसकेका थिए। अदालतको अवहेलना भएमा त्यसको जिम्मेवारी सम्बन्धित पक्षले नै बेहोर्नुपर्ने चेतावनी पनि उक्त पत्रमा दिइएको थियो।
