कात्तिक ९, विराटनगर । जिल्ला सुरक्षा समिति मोरङ्गले तिहारमा राती १० बजेसम्म मात्र देउसी भैलो खेल्ने अनुमति दिने निर्णय गरेको छ ।
आज विराटनगरमा बसेको सुरक्षा समितिको बैठकले सो निर्णय गरेको हो । चाडपर्वको बेला जुवा, तास खेल्ने र मदिरा सेवन गरी शान्ति सुरक्षामा खलल पुर्याउने जो कोहीलाई कानुनी दायरामा ल्याउने समितिले बताएको छ । दिपावली मनाउने क्रममा पटाका र आतिशवाजी जस्ता विष्फोटक पदार्थको प्रयोगबाट स्वास्थ्य तथा सुरक्षामा पनि गम्भीर असर पर्ने, चोटपटक लाग्ने तथा आगलागी भई धनजनको क्षति हुन सक्ने भएकोले त्यस्ता विष्फोटक तथा प्रज्वलनशील पदार्थहरुको उत्पादन, आयात, निर्यात, खरिद, बिक्रि वितरण र ओसारपसारमा पुर्ण रुपमा रोक लगाउने समेत सुरक्षा समितिको बैठकले निर्णय गरेको छ ।
चाडपर्वमा हुन सक्ने महङगी, काला बजारी, म्याद सकिएका खाद्य पदार्थको भण्डारण र बिक्रि वितरणलाई प्रभावकारी रुपमा अनुगमन, नियमन र नियन्त्रण गरिने समितिले प्रष्ट पारेको छ ।
