विराटनगर, १० कात्तिक ।
नेपाल गन्गाई कल्याण समिति परिषद जहदाले शिक्षक सेवा आयोग र एसईई परीक्षामा उत्तीर्ण शिक्षक तथा विद्यार्थीहरुलाई सम्मान गरेको छ ।
शुक्रबार जहदा गाउँपालिका वडा नं. ६ मा आयोजित एक कार्यक्रमबीच उनीहरुलाई सम्मान गरिएको हो । कार्यक्रममा गन्गाई जातिबाट शिक्षक सेवा आयोगको परीक्षामा उत्तीर्ण हुने २१ जना र जहदा गाउँपालिकामा रहेका ७ वटा सामुदायिक विद्यालयबाट उत्कृष्ट अङक ल्याई एसईई परीक्षामा उत्तीर्ण हुने १४ जना सम्मानित भएका छन ।
कार्यक्रममा गन्गाई जातिको धर्म संस्कृति झल्काउने सांस्कृतिक कार्यक्रम समेत प्रस्तुत गरिएको थियो । नेपालबाट गन्गाई जाति लोपउन्मुख अवस्थामा रहेकाले यस्ता कार्यक्रमहरुले गन्गाई जातिको अस्तिस्व जोगाउन मद्दत पुग्ने नेपाल गन्गाई कल्याण समिति परिषद जहदा गाउँपालिका वडा नं ६ का अध्यक्ष विकेश कुमार मण्डलले बताए । उनले हाल गन्गाई जाति नेपालको झापा र मोरङ जिल्लाको भारतीय सीमावर्ती क्षेत्रमा मात्रै पाईने गरेको जानकारी दिए ।
कार्यक्रममा भने नेपाल गन्गाई कल्याण समिति परिषद जहदा कार्यसमितिका अध्यक्ष काशीराम मण्डल, परिषदका केन्द्रिय अध्यक्ष श्याम प्रसाद मण्डल, जहदा गाउँपालिकाका अध्यक्ष कैलाश प्र. मण्डल र धनपालथान गाउँपालिकाका अध्यक्ष हरिलाल सिंह लगायतका बिशिष्ट व्यक्तित्वहरुको उपस्थिति रहेको थियो ।
