विराटनगर, कात्तिक १२

आज कायस्थ समुदायको बिशेष पर्व चित्रगुप्त पूजा देशैभरि हर्षोल्लासका साथ मनाईदैछ ।

भाइटीकाको दिन गरिने यस पूजामा देश तथा विदेशमा रहेको कायस्थ समुदायले अनिवार्य रुपमा आफ्ना वंश पिता भगवान श्री चित्रगुप्त र कलमको पूजा गर्छन् । पूजाका अवसरमा ती समुदायले आज विराटनगरको तिनपैनी, आदर्शटोल, बखरी, चाँदनीचौक र सैनिकटोल लगायतका स्थानमा हातमा कलम बोकेका भगवान चित्रगुप्तको पूजा अर्चना गरिनुका साथै आज रातभरी जाग्राम बस्ने गरी विविध मनोरञ्जनात्मक सांस्कृतिक कार्यक्रमको आयोजना गरिनेछ ।

चित्रगुप्त समाज कल्याण परिषद् युवा समिति तिनटोलीयाले यसै अवसरमा मौलिक मिथिला चित्रकला प्रदर्शनी र सांस्कृतिक कार्यक्रम आयोजना गरेको छ । श्रृष्टिकर्ता परमपिता ब्रम्हाको इच्छापुत्र चित्रगुप्तको सन्तान भएको मान्यता राख्ने यो समुदायले सदियौँदेखि यो परम्परा मान्दै आएका हुन् । भाइटीकाको दिन सम्पन्न हुने यस पूजाको भोलिपल्ट नजिकैको पवित्र जलाशयमा भगवान चित्रगुप्तको प्रतिमा सेलाउने गरिन्छ ।

कलमका देवता तथा मानिसको पाप र पूण्यको लेखाजोखा राख्ने देउताको रुपमा भगवान चित्रगुप्तको पूजा गर्ने गरिन्छ । चित्रगुप्तलाई भगवान ब्रम्हाद्वारा यमराजको दरबारमा नियुक्त गरिएको कुरा पद्म पुराणमा उल्लेख छ । चित्रगुप्त पूजाको दिनमा कायस्थ समुदायले कलम प्रयोग नगरी यसलाई धोइपखाली बिधिपूर्बक मन्त्रोचारण गरी पूजा गर्दछन् ।

तपाईको प्रतिक्रिया