विराटनगर, पुष २४
विराटनगर ७ का वडा अध्यक्ष हुन् मुधबाबु तिवारी । आर्दश बहुमुखी क्यापस पछाडि रहेको मात्रिका मार्ग सोहि वडामा पर्छ । व्यवस्थित सडक बनाउने भन्दै ५ वर्ष अघि भत्काईएको उक्त मार्ग अझै पनि अलपत्र छ । स्थानीय तहको निर्वाचनपछि जनप्रनिधिले सडक बनाउलान् भन्ने वडावासीमा आशाको किरण पलाएको थियो । तर स्थानीय निकायको चुनाव भएको तिन वर्ष बित्न लागी सक्दापनि उक्त सडक बन्न नसकेको पछि जनताको सबै आशाहरु र जनप्रतिनिधिप्रतिको विश्वास धमिलिन थालेको छ ।
उक्त सडकको विषयमा पटक पटक वडावासीले वडाध्यक्ष तिवारीलाई जानकारी गराईसकेका छन् । तर वडाध्यक्ष तिवारीले जनताको गुनासो एक कानले सुन्ने अर्को कानले उडाउने गरेको स्थानीयहरुको गुनासो छ । वडावासीको समस्याहरु प्रति वडाध्यक्ष तिवारी गम्भीर नभएकाले पनि हालसम्म उक्त सडक बन्न नसकेको स्थानीयहरु बताउँछन् । अर्को तर्फ वडाअध्यक्ष तिवारीले भने उक्त सडक बनाउनको लागी आफुले पहल गरिरहेको प्रतिक्रिया दिएका छन् । बाटो बनाउन लागी थुप्रै घरका पर्खालहरु भत्काउनु पर्ने भएको र पर्खाल भत्काउन घरधनीहरु सकारात्मक नभएकाले बाटो निमार्णको काम अघि बढाउन अफ्ठ्यारो भईरहेको वडाध्यक्ष तिवारी बताउछन् ।
उक्त विषयलाई लिएर वडाअध्यक्ष तिवारी र सोही वडाका वडा सदस्य जितेन्द्र अग्रवालविच पटक पटक विवाद समेत भईसकेको छ । सदस्य अग्रवाल यथासिग्र सडक बन्नुपर्छ भन्ने पक्षमा छन् ।
उक्त सडको बिच्च भागमा ढल र खानेपानीका लागी ठुला ठुला खाल्डो खनिएका छन् । यात्रुहरु बेला बेला त्यस खाल्डोमा बजारिने समेत गरेका छन् । कायाै पटक मोटरसाईकल तथा गाडीहरु उक्त खाल्डोमा परिसकेको स्थानीयहरु बताउँछन् ।
