विराटनगर साउन २१
सनराईज बैंक विराटनगरको एक महिला कर्मचारी बैंकभित्रै मृत अवस्थामा फेला परेकी छिन् । बैंंकको कर्जा शाखाकी वरिष्ठ सहायक अधिकृत सनाज खतिवडा आज दिउसो (बुधबार) मृत अवस्थामा बैंंकको स्टोरमा मृत फेला परेकी हुन् ।
मृतकको शवसँगै घटनास्थलमा मुसा मार्ने दवाई समेत भेटिएको छ । सोही मुसा मार्ने दवाई सेवनको कारण खतिवडाको मृत्य भएको हुनसक्ने प्रहरीको प्रारम्भिक अनुसन्धानले देखाएको छ । मृतकको ब्यागबाट सुसाइड नोट समेत फेला परेको छ । सुसाइड नोटमा के लखिएको छ भन्ने बारे प्रहरीले खुलाएको छैन । मृतकको शवलाई पोष्टमाटमको लागी कोशी अञ्चल अस्पताल विराटनगर पठाईएको प्रहरीले जनाएको छ ।
घटना शंकास्पद
उक्त घटना भएको बेला बैंकको सुरक्षा गार्डसँगै हाराहारी आधा दर्जन कर्मचारी बैंकमै रहेको स्रोतले बताएको छ । र बैंक भित्रै जातततै सिसिटिभी क्यामेरा रहेकाले बैंक भित्रै आत्माहत्या गर्ने कुरा स्वाभावीक नभएको स्रोत बताउँदछ ।
अनुसन्धानमा खटिएका प्रहरीले पनि पुर्ण अनुसन्धानपछि मात्र मृत्यु कसरी भएको हो भन्ने बारे बताउन सकिने बताएका छन् । वडा प्रहरी कार्यलय विराटनगरका डिएसपी बेदप्रसाद गौतमले प्रारम्भिक अनुसन्धानमा आत्महत्या भएको जस्तो देखिएपनि यकिन घटना के भएको हो भन्ने बारे पुर्ण अनुसन्धानपछि मात्र खुल्ने बताएका छन् ।
पत्रकारलाई घटनास्थलमा प्रवेश निषेध
घटना भए लगतै आधा दर्जन पत्रकारका समाचार संकलनका लागी घटनास्थलमा पुगेका थिए । तर बैंक प्रशासनले भने पत्रकारहरुलाई घटनास्थलमा प्रवेश गर्न दिएको थिएन । उक्त बैंकका प्रबन्धकलाई घटनाबारे पत्रकारहरुले सोधपुछ गर्न खोजेपनि बैंकका जिम्मेवार कर्मचारीहरु पत्रकारको सम्पर्कमा आउन चाहेनन् ।
बैंक प्रशासनको उक्त कदमले पनि घटनालाई थप शंकास्पद बनाएको छ ।
