विराटनगरमा अन्दोलनकारी आक्रमक

विराटनगर, माघ २२
पुष्पकमल दाहाल प्रचण्ड र माधवकुमार नेपाल समूहको नेपाल कम्युनिष्ट पार्टीले (नेकपा) आज आह्वान गरेको देशव्यापी आमहड्ताको प्रभाव विराटनगरमा समेत परेको छ ।
बन्दकर्ताहरुले विहानदेखिनै चार चक्के सवारीहरु चल्न दिएका छैनन् । उनीहरुले ठाँउ–ठाँउमा टायर बालेर सवारी आवत जावतमा अवरोध पुर्याई रहेका छन् । दुइ चक्के सवारी तथा सिटिसफारीहरु फाटफुट रुपमा गुडिरहेका छन् ।
विराटनगरका प्राय चोकहरुमा हड्ताल सफल बनाउन बन्दकर्ताहरु समुह बनाएर बसेका छन् । बरगाछी, शनिमन्दिर, जनआन्दोलन चोक लगायतका स्थानमा बन्दकर्ता समूह–समूह बनाएर सडकमा निस्किएका छन् । उनीहरुले बिहानदेखि नै बजारक्षेत्रमा पसलहरु खोल्न दिएका छैनन् । विराटनगरको विद्यालयहरुपनि संचालनमा आएको छैन् । बैंक तथा वित्तयसंस्थाहरु भने सुरक्षा निकायको कडा निगरानीमा खुलिरहेको छ ।
यसैक्रममा विराटनगरको शनिमन्दिरमा बन्दकर्ताले टायर बालेर प्रदर्शन गरेका छन् । बन्दकर्ताले बा १ झ ९११८ नम्बरको सरकारी गाडी तोडफोड समेत गरेका छन । सरकारी गाडी तोडफोड गरेको आरोपमा नेपाल समूहका पाँचजना कार्यकर्तालाई मोरङ प्रहरीले गिरफ्तार समेत गरेका छ ।
प्रहरी धरपकड गरेको भन्दै विराटनगरमा अन्दोलनकारीहरु झन झनै आक्रमक बनेका छन् ।

फाेटाे : पिताम खतिवडा