काठमाडौं, फागुन ७
आज ७१ औँ प्रजातन्त्र दिवस देशभर विविध कार्यक्रम गरी मनाइँदैछ । आजकै दिन अर्थात फागुन ७ गते १ सय ४ बर्षे जहाँनियाँ राणाशासनको अन्त्य भई प्रजातन्त्र बहालीभएको खुशीमा प्रजातन्त्र दिवस मनाउने गरिन्छ । राज्यभर र विदेशस्थित नेपाली राजदूतावास, कूटनीतिक नियोग तथा वाणिज्य दूतावासमा समेत हर्षोल्लासपूर्वक सो दिवस मनाइँदै छ ।
आज राष्ट्रपति विद्यादेवी भण्डारीको उपस्थितिमा सैनिकमञ्च टुँडिखेलमा बिभिन्न कार्यक्रमहरुको आयोजना हुँदैछ । सो कार्यक्रममा नेपाली सेनाद्वारा तोप र बन्दुकको बढाइँ गरिने छ । यस्तै फागुन ६, ७ र ८ गते घर–घरमा साँझ दीपावली गर्न तथा विद्यालय, सङ्घ संस्था, पालिका र प्रदेशमा पनि दिवस मनाउन सरकारले आग्रह गरेको छ ।
