विराटनगर,१८ फागुन
मोरङको उर्लाबारीमा सन्थालहरुको लागी निर्माण गरिने एकिकृृत बस्तीको शिलान्यास गर्न प्रधानमन्त्री केपी ओली आज आउने भएका छन् ।
विपन्न सन्धाल परिवारका लागी उर्लाबारीमा एक सय ३६ वटा घर निर्माण गरिने भएको हो । बस्ति निर्माणको लागी करिब ३० करोड रुपैयाँको लाग्ने अनुमान गरिएको छ ।
बस्तीको लागि आवश्यक पर्ने सडक, खानेपानी, मनोरञ्जन स्थल, खोल्सी संरक्षण, सरसफाई, बाल विकास केन्द्र, विद्यालय, स्वास्थ्य चौकी, सामुदायिक भवनलगायतको निर्माण गर्ने गरी गुरुयोजना तयार गरिएको छ ।
सन्थालका लागी उर्लाबारी नगरपालिका–८ र ९ को सीमामा रहेको रातोहोली खोल्सीको छेउमा एकीकृत बस्ती बन्ने भएको हो । शिलान्यास पछि शहरी विकास मन्त्रालयको जनता आवास कार्यक्रममार्फत बस्ती निर्माण हुने उर्लाबारी–८ का वडा अध्यक्ष कुलबहादुर कार्कीले जानकारी दिए ।
रातोहोलीको उत्तर–दक्षिण फैलिएको सात सय ८० मिटर लम्बाईभित्र पर्ने ५२ हजार आठ सय २८ वर्ग मिटर जग्गामध्ये ३१ हजार सात सय ६८ वर्ग मिटरभित्र बस्ती विकास हुने छ । प्रत्येक परिवारका लागि दुई कोठा, एक÷एक भान्सा र शौचालय भएको घर बन्ने छ ।
