विराटनगर, चैत्र २
चालु आर्थिक वर्षको दोस्रो चौमासिक अवधीसम्ममा खाद्य प्रविधि तथा गुणनियन्त्रण कार्यालय विराटनगरले सात वटा उद्योग विरुद्ध मुद्दा दर्ता गरेको छ । कार्यालयले आइतबार विराटनगरमा दोस्रो चौमासिक समिक्षा गोष्ठि गर्दै हालसम्मको प्रगति सार्वजानिक गरेको हो ।
लेवल नलगाई खाद्यवस्तु तथा गुणस्तरहिन खाद्यवस्तु बिक्री वितरण गर्ने सात उद्योगका सञ्चालक विरुद्ध खाद्य प्रविधि तथा गुणनियन्त्रण कार्यालय विराटनगरले मुद्दा दर्ता गरिएको हो ।
विराटनगर– ९ कलेज रोडमा सञ्चालित विराट गोल्छा घ्यु प्याकेजिङ उद्योग , बालाजी डेरी उद्योग , बालाजी टेडिङ्ग एण्ड कन्सर्न ले न्यून गुणस्तरको घ्यू उत्पादन गरेको भन्दै उक्त उद्योगहरुका सन्चालकहरु विरूद्ध मोरङ अदालतमा अभियोग दर्ता गरिएको थियो ।
विराटनगर–४ शिवम् डेरी उद्योगले अस्पष्ट लेबल विवरण गरेको भेटिए पछी उद्योगका संचालक विरुद्ध जिल्ला प्रशासन कार्यालय मोरङमा १० हजार रुपैयाँ जरिवना मागदाबी राखि अभियोग दर्ता गराएको थियो । त्यस्तै मोरङको बुढीगंगा गाउँपालिका ७ स्थित एसियन फिड्स प्रालिले उत्पादन गर्ने कुखुराको दाना गुणस्तरहिन भेटिएपछि उक्त कम्पनी विरूद्ध जरिवना र कैद सजायको माग दावी राखेर अभियोग दर्ता गरिएको थियो ।
चालु आर्थिक वर्षको दोस्रो चौमासिक अवधी भित्रमा १ सय ४३ वटा उद्योग निरीक्षण गरेको विभागले बताएको छ ।
