काठमाडौं, वैशाख ३
नारायण मन्दिरबाट हराएको मूर्ति ३७ वर्षपछि फेला परेको छ । ललितपुर महानगरपालिका–१६ स्थित नारायण मन्दिरमा रहेको मूर्ति हराएको ३७ वर्षपछि संयुक्त राज्य अमेरिकामा फेला परेको हो ।
बिहीबार पुरातत्व विभागले हराएको सो मूर्ति ललितपुर महानगरपालिकालाई हस्तान्तरण समेत गरेको छ । उक्त मूर्तिलाई हालका लागी पाटन सङ्ग्रहालयमा राखिने महानगरपालिकाले जनाएको छ ।
सन् २०२० मा सो मूर्ति अमेरिकाको टेक्ससस्थित डल्लास सङ्ग्रहालयमा रहेको जानकारी प्राप्त भएपछी मूर्तिका बारेमा आवश्यक जानकारी सङ्कलन गरेर संस्कृति, पर्यटन तथा नागरिक उडड्यन मन्त्रालयमार्फत परराष्ट्र मन्त्रालय पठाएको थियो । सोही प्रमाणका आधारमा अमेरिकास्थित नेपाली दूतावासले मूर्ति फर्काउन पहल गरेको थियो । सेही पहलबाट २०७७ चैत ३१ मा मूर्ति नेपाल फर्काइएको विभागले जनाएको छ ।
युनेस्कोको सन् १९७० को गैरकानूनीरूपमा सांस्कृतिक वस्तुको चोरी निकासी र ओसारपसारलाई रोक लगाउने सम्बन्धी महासन्धिको नेपाल पक्ष राष्ट्र भएसँगै यस्ता सम्पदा क्रमशः फर्किएको विभागले जनाएको छ । हालसम्म बेलायतबाट १९ थान, अष्ट्रेलियाबाट एक, अमेरिकाबाट १०, तिब्बतबाट २८ र जर्मनीबाट एक थान मूर्ति फिर्ता भइसकेको समेत विभागले जनाएको छ ।
