विराटनगर, चैत ११
नेपाली चेलचित्रका युवा–लोकप्रिय नायक पल शाह कारागार चलान भएका छन् । नाबालिग गायिकामाथि बलात्कार गरेको आरोपमा थुनामा रहेका नायक पल शाहलाई पुर्पक्षको लागि थुनामा पठाउन आदेश दिएको छ ।

बिहिवार जिल्ला अदालत तनहुँमा थुनछेक बहस सकिएपछि अदालतका न्यायाधीश हरिशचन्द्र ढुंगानाको इजलासले शाहलाई पुर्पक्षका लागि थुनामा पठाउन आदेश दिएको हो ।

ADVERTISEMENT

झूटो प्रेमको बहाना गरेर आफुलाई पलले पटकपटक बलात्कार गरेको भन्दै नबालिग गायिकाको परिवारले तनहुँ प्रहरीमा फागुन ११ गते उजुरी दिएको थियो । उजुरी दिएपछि बेपत्ता भएका पल १५ गते तनहुँ प्रहरीमा हाजिर भएका थिए ।

मुलुकी फौजदारी कार्यविधि संहिता, २०७४ मा तीन वर्षभन्दा बढी सजाय हुने आरोपमा मुछिएको व्यक्ति घटनामा संलग्न छ भन्ने प्रारम्भिक सुनुवाइमा देखिएमा पुर्पक्षका लागि थुनामा पठाउने व्यवस्था छ । अब अन्तिम टुंगो नलागुञ्जेलसम्म आरोपित पललाई थुनामा राखेर मुद्दाको प्रक्रिया अघि बढाइनेछ ।