विराटनगर, चैत २५
सिटक्षमता भन्दाबढी विद्यार्थी कोचेर स्कुल–बस गुडाउने विराटनगरको बाल कल्याण विद्या मन्दिर (बिकेभिएम) स्कुललाई कारवाही भएको छ ।
जिल्ला ट्राफिक कार्यालय मोरङले विराटनगरको घाँसचोकमा विद्यार्थी कोचाकोच गरि राखिएको अवस्थामा सो स्कुलको बस फेला पारेको थियो । जम्मा ३९ सिटक्षमता भएको सो बसमा स्कुलले ७० भन्दाबढी विद्यार्थी कोचाकोच गरि खादेको चेकजाँचको क्रममा फेला परेको थियो ।
विकेभिएमले प्रति विद्यार्थी बससेवा बापत मासिक २ हजार रुपैयाँसम्म लिने गरेको छ । चर्को महशुल तिरेपनि आफ्नो बालबालिका भने उभ्भिएर आउजाउ गर्नुपरेको अभिभावकहरुको गुनासो छ । तर आफ्नो बालबालिकालाई विभिन्न बाहानामा स्कुलले कारवाही गर्नसक्ने त्रासले कोही पनि अभिभावक स्कुलको ज्यादती विरुद्ध बोल्न सकेको थिएन ।
स्कुल तथा कलेज बसहरूले क्षमताभन्दा बढी विद्यार्थी राखेर सवारी साधन कुदाउने गरेको जनगुनासो बढेपछि जिल्ला ट्राफिक प्रहरी कार्यालयले बुधबारदेखि विशेष अभियानसुरू गरेको हो ।
