✍ निरज बस्नेत
विराटनगर, वैशाख २०
विराटनगर ११मा एमालेको पकड बलियो रहेको पाईन्छ । यस वडामा नेपाली कांग्रेसबाट राम सुन्दर राजवंशीको वडा अध्यक्षमा जित्ने दावी छ । यसपाली लालकिल्ला भत्काई रुखको विजय झण्डा गाड्ने राजवंशीको दृढ संकल्प छ । नेविसंघको विद्यार्थी राजनितीबाट महेन्द्र मोरङ क्याम्पसमा राजनितीको श्री गणेश गरेका राजवंशीको मुख्य चुनावी एजेण्डामा शिक्षा, स्वास्थ्य, सरसफाई छन् ।
वडामा दुई सामुदायीक विद्यालय, जनपथ र अरुणदय आधारभुत रहेका छन् । जनपथको केही हदसम्म ठिक भएतापनि अरुणदयको खासै राम्रो शिक्षाको गुणस्तर छैन । यस विद्यालयलाई सुधार्ने राजवंशीको संकल्प रहेको छ ।
स्वास्थ्य चौकी भएता पनि वडावासीको पहुँचमा पुगेको छैन् । यसलाई वडावासीको आफ्नै बनाउने सुरमा उनी छन् । सरसफाईमा अब्बल बनाई छाड्ने मुद्दा पनि संगै छन् । सुकुम्बासीको संख्या एक सय देखि एक सय पचासको हाराहारी मात्र भएतापनि यो समस्या ठुलै देखिन्छ । यसलाई आवश्यक मात्रमा सम्बोधन गर्ने बाचा पनि राजवंशीको छ ।
२०३९ साल फागुन १४ मा जन्मिएका राजवंशीको युवा जोश वरकरार छ । उनको टिमका सदस्यहरु लक्ष्मण कोईराला किसान पृष्ठभुमीका हुन् । कृष्ण भट्टराई व्यवसायी हुन् , गायत्री थापा गृहणी हुन्, दलित तर्फ अर्की गृहणी ज्ञेनदीवी पासवान हुन् । पाँच जानाको यो टिम, सशक्त रहेको दावी राजवंशीको छ । सात हजार हाराहारीमा मतदाता रहेकोमा ५५ सय जति मत खस्ने अनुमान छ । १५ सय जति यसमा नँया मतदाता समावेश छ । १ हजार ५ सय भोट ल्याएमा जित सुनिश्चित हुन्छ । यसअघिको चुनावमा एमालेका तिर्थेन्द्र न्यौपानेले ३ सय बढी मतान्तरले कांग्रेसका उम्मेदवारलाई पराजीत गरेका थिए । यिनै न्यौपाने यो पाली फेरी वडाध्यक्षमा एमालेबाट उठेका छन् ।
कांग्रेसकी नेतृ केन्द्रिय सदस्य डिला संग्रौलाको समेत वडा हो । संग्रौलाले चुनावी प्रचारप्रसारमा घरदैलो कार्यक्रममा भौतिक रुपमै उपस्थिति जनाईरहेकी छिन् । यसबाट समेत राजवंशीलाई फाईदा पुगीरहेको देखिन्छ ।
