निरज बस्नेत
विराटनगर, वैशाख २६
सत्तारुढ गठबन्धनका साझा उपमेयरका उम्मेदवार अमरेन्द्र यादव एवं प्रमुख प्रतिपक्षी दल एमालेकी उपमेयरकी उम्मेदवार शिल्पा निराला कार्की बीचमा बिराटनगरमा कडा प्रतिष्पर्धा हुने अनुमान हुदैछ । यसलाई अमरेन्द्र भर्सेज शिल्पाको लँडाई मानिदैछ ।

जसपाका केन्द्रिय अध्यक्ष उपेन्द्र यादवका छोरा एवं व्यवसायी गिरेन्द्र कार्कीकी श्रीमती शिल्पाबीचको भिडन्तलाई यतिबेला चासोका साथ हेरिएको छ । बुवाको विरासतको रुपमा आएका अमरेन्द्र राजनितीका नौला खेलाडी हुन् ।

केपी ओली संगको गिरेन्द्रको सामिप्यताको कारण शिल्पाले उपमेयरको टिकट हत्याएको एमालेका कार्यकर्ता बताउँछन् । माओवादी केन्द्र पार्टी परित्याग गरी एक्लिएकी नमिता न्यौपानेको चुनाव चिन्ह लालटिन छाप बाट उपमेयरमा स्वतन्त्र उम्मेदवारी परेको छ । तर पनि न्यौपानेलाई माओवादीका स्थानीय नेता तथा कार्यकर्ताले भित्रभित्रै सहयोग गरिरहेको बुझिएको छ ।

राप्रपाका मोरंग जिल्ला अध्यक्ष माधवराज आचार्यकी श्रीमती वृन्दा आचार्यको पनि उपमेयरमै उम्मेदवारी छ । न्यौपाने एवं आचार्यलाई खासै बिराटनगरवासीले रुचाएको पाईदैन । केही समय अगाडी पल्लाभारी दुवैको हकमा देखिएतापनि चुनाव नजिकिएसँगै उनीहरुको कार्यशैली कै कारण आममतदाता चिढीएका छन् । अन्ततःयादव र कार्की बीचमा नै उपमेयरका लागी जित–हारको तीव्र संभावना रहेको छ ।

कोशी अंचल अस्पताल व्यवस्थापन संचालक समितिमा लाभको पदमा बसी एकलाख बढी भत्ता बुझेको र राजीनामा नदिई उपमेयरमा उम्मेदवारी दर्ता गरिएको र पछि किर्ते कागज बनाई गलत दर्ता नम्वर पेश गरेको कारण, जसपाका अमरेन्द्रले सर्वोच्चमा रिट दायर गरेका छन् । शिल्पाको उपमेयरको उम्मेदवारी बदरको माग सहित दायर रिटमा २८ वैशाखमा सर्वोच्चको के आदेश आउँला सबैको प्रतीक्षाको बिषय बनेको छ ।

यदि तत्काल अन्तरिम आदेश आएमा अमरेन्द्रलाई जित सहज हुन सक्छ । आदेश यादवको विपक्षमा आएमा लँडाइँ शिल्पा भर्सेज अमरेन्द्र बीचमा नै हुनेछ । दुवैले आफुले नै उपमेयरको पद जित्ने दावी गरी घरदैलौ कार्यक्रम समेत लगभग सकिसकेका छन् । यसअघि उपमेयर कांग्रेसकी इन्दिरा कार्कीले जितेकी थिइन् । निकटतम् प्रतिद्धन्द्धी माओवादीकी नमिता न्यौपाने थिइन् ।

तपाईको प्रतिक्रिया