बिराटनगर, जेष्ठ ५
निरज बस्नेत
बिराटनगरको मुटु बरगाछी चोकमा कुनै समयमा वास्तविकतामा नै बरको रुख थियो । यहि भएर यस चोकको नाम बरगाछी रहन पुग्यो ।
त्यसबेला सडक विस्तार गर्नेक्रममा उक्त ऐतिहासिक बरगाछीको रुख काटियो । त्यसपछि लामो समयसम्म यस ठाउँमा कुनै पनि किसिमको रुख नरहेको अवस्था थियो । यसलाई नै परिपूर्ति गर्न भनेर केहि बर्ष अगाडी रोटरी क्लब बिराटनगरले बरकै रुखको झल्को दिनेगरि एक स्तम्भ बनाएको थियो । उक्त स्तम्भ पनि सडक दुर्घटनाका कारण भत्कियो ।
यही अभावलाई मध्यनजर गर्दे समाजसेवी लेखक दधिराज सुवेदीको विशेस सहयोगमा अहिले स्व. पिताजी कृष्ण प्रसाद कोईरालाको अर्धकदको सालिक सहितको स्तम्भ निर्माण भईसकेको छ । पूर्ण रुपमा तयार भईसक्दा समेत उद्घाटनमा ढिला भईरहेको छ ।
भीम पराजुली मेयर भएकै बेलामा बरगाछीको सालिक उद्घाटन गर्ने सोच बनाएका थिए । यसै बिचमा स्थानीय चुनाव नजिकिएसंगै भीमको सक्रियता मेयरको टिकटका लागि बिराटनगर काठमाडौं गर्देमा बित्यो । अन्ततः न त मेयरको टिकट नै हात लाग्यो न त बरगाछीको स्तम्भ नै उद्घाटन गर्ने अवसर मिल्यो ।
अहिले बिराटनगरमा स्थानीय चुनावको मतपरिणामको रौनकतामा रहेकै कारण यस सालिक सहितको स्तम्भलाई वेवास्ता गरिएको छ । बिराटनगर निवासी दधिराज सुवेदीको प्रत्यक्ष संलग्नतामा निर्माण गरिएको यस सालिक सहितको स्तम्भ अब कसले अनावरण गर्ला त ? बिराटनगरले मेयर नै पाएपछी मात्र संभवत् उद्घाटन गर्ने कार्यक्रम तय भएको विश्वस्त्र सूत्रले बतायो ।
वि. स. १९३६ मा दुम्जामा जन्मिएका पिताजीका छोराहरु स्व. मातृका, वि.पी., गिरिजा तिनैजना नेपालका सफल प्रधानमन्त्री हुन् । काठमाडौं बन्दीगृहमा रहदा नै वि. सं. २००१ सालमा पिताजीको देहान्त भएको थियो । उनको निधन भएको समेत ७८ बर्ष भईसकेको छ ।
पिताजीको विविध क्षेत्रमा अतुलनीय योगदान रहेको छ । जसमध्ये काली मन्दिर बिराटनगरका संस्थापक मध्येका एक , नेपालको पहिलो उधोग बिराटनगर जुटमिलका संस्थापक मध्येका एक, प्रारम्भमा ५ विघा जग्गा प्रदान, मोरंगको सदरमुकाम रंगेलीलाई बिराटनगर सार्ने मध्येका एक, भारतीय रेल र हुलाक जोगबनी सम्म ल्याउने प्रमुख व्यक्ति मध्ये एक, नेपालको पहिलो सहकारी उधोगी गोला १९७३ का संस्थापक समेत हुन् ।
सुखद यस मानेमा की स्व. पिताजीको सालिक सहितको स्तम्भ बनेको छ । विडम्बना यस मानेमा की बरगाछीको अस्तित्व झल्किने प्रतिकात्मक बिम्व समेत यस स्तम्भमा अटाएन ।
