विराटनगर, साउन २९
नेपाली टायर उद्योग ग्रिन टायर प्रालिले शेर्पा ब्राण्डको ‘एग्रिकल्चर टायर’ बजारमा ल्याएको छ । मोरङको कटहरी ४ मा रहेका सो उद्योगले शेर्पा ब्रान्डमा थप ६ प्रकारका टायर उत्पादन गरी बजार पठाएकाे हाे ।
उद्योगले विराटनगरमा बिहीबार एक कार्यक्रम आयोजना गरी उक्त टायर बजारमा ल्याएको जानकारी गराएको छ । कार्यक्रममा मोरङ व्यापार संघका अध्यक्ष नवीन रिजाल र ग्रीन टायर उद्योग प्रा.लि.का प्रबन्धक निर्देशक विनित सिंघानियाले संयुक्त रुपमा टायर सर्वाजानिक समेत गरेका थिए ।
ट्याक्टर तथा हाते ट्याक्टरका लागि शेर्पा ब्राण्डका भूमि, सारथी मोडलका ठूला र साना टायरहरू उत्पादन सुरू गरिएको प्रबन्धक निर्देशक सिंघानियाले बताए । उनका अनुसार उच्च पहाडी भेगमा चल्ने ६० एचपीभन्दा बढीका, भित्री मधेस तथा सामान्य पहाडी भेगमा चल्ने ६० एचपीका र तराईमा चल्ने ३५ देखि ४५ एचपीका ट्र्याक्टरका साना र ठूला दुवैखाले टायरको उत्पादन यस उद्योगले थालेको हो।
शेर्पा टायर भारतमा उत्पादित विभिन्न ब्रान्डका ट्र्याक्टरका टायरका भन्दा १० देखि १५ प्रतिशतले सस्तो भएको कम्पनीको दाबी छ । र गुणात्कम हिसाबले पनि शेर्पा टायर अन्य भारतिय टायरहरु भन्दा अब्बल रहेको समेत कम्पनीको जिकिर छ ।
शेर्पा ब्रान्डका टायरमा काँटी गाडिने सम्भावना कम भएका, टायर हिलोमा नभासिने तथा नचिप्लिने, गहिरोमा पनि चलाउन सकिने र पन्चर हुने सम्भावना पनि कम भएको समेत कम्पनीको तर्फबाट बताईएको छ ।
उद्योगले २०७३ सालदेखि डेल्टा ब्रान्डमा मोटर साइकल र थ्री ह्विलरका टायरको उत्पादन गरेर आफ्नो व्यवसाय सुरु गरेको थियो।
