विराटनगर, कार्तिक १७
निरज बस्नेत
मोरङ–६ निर्वाचन क्षेत्रमा राप्रपाले आयोजना गरेको कार्यक्रममा रोचकता देखिएको छ । बुढीगंगा गाउँपालिका वडा नं. ३ मा स्थायी रुपमा बस्ने विन्दा देवी राजवंशीको अगुवाईमा सयौं कार्यकर्ताहरु राप्रपामा प्रवेश गरेका छन् ।
कांग्रेस, एमाले, माओवादी लगायतका दल परित्याग गरी राप्रपामा ईन्ट्री मार्नेको लर्को लागेको देखियो । यो क्रमले आगामी दिनमा समेत निरन्तरता पाउने विन्दा बताउँछिन् । १ सय ५० बढी घरधूरीबाट दर्जनौंको संख्यामा कार्यकर्ताहरु रमाईलो मान्दै राप्रपामा प्रवेश गरेका हुन् ।
कार्यक्रम बुढीगंगा गाउँपालिका ३ स्थित एक मन्दिरको प्रांगणमा सम्पन्न भएको थियो । यस कार्यक्रमलाई रोक्न यसै ३ नं. वार्डका वार्ड अध्यक्ष तिलक मण्डल खुलेर लागेको कुराको जानकारी विन्दाले दिईन् । तरपनि साहसी विन्दाको अगाडी तिलकको केही सिप चलेन । फलतः कार्यक्रम ऐतिहासिक रुपमा सफल भएको स्वयं विन्दाको दावी रहेको छ ।
विन्दाले यसअघि स्थानीय चुनावमा उनै तिलकलाई नै भोट हालेको कुरा समेत बताईन् । र, पटक–पटकको चुनावमा समेत कहिले कांग्रेस त कहिले एमाले सवैलाई राम्रै साथ दिएको बताउँछिन् । तर, जिते पश्चात् कसैले केही पनि माछो मारेनन् ।
तत्पश्चात् विरक्तिएकी विन्दालाई राप्रपा पार्टीको सवैथोक मनपर्यो । तसर्थ आफूपनि राप्रपा प्रवेश गरिन् । सँगै अन्य सयौंलाई प्रवेश गराईन् । यस कार्यक्रममा मोरङ–६ का राप्रपाका उम्मेदवार गोपाल क्षेत्री कटुवालले सवैसँग एकआपसमा खुसी साटासाट गरेका थिए । साथमा छोटो मन्तव्य व्यक्त गर्दे आगामी मंसीर–४ को प्रतिनिधि सभाका चुनावमा आफूलाई विजय गराएको खण्डमा माननीय भएमा यसै ठाउँमा शुरुमा आएर अविर जात्रा गर्ने र सधैभरी जनताकै सेवामा दत्तचित्त भई काम गर्ने प्रतिवद्दता समेत व्यक्त गरे ।
