विराटनगर, मंसीर २१
निरज बस्नेत
आर्थिक प्रशासनमा मास्टर्स–डिग्री होल्डर , उमेरले भर्खर २७ की कलिली , केही गरौ खालको अद्भूत समय , राम्रीमा असाध्यै राम्री , यस्ती होनहार महिला पुष्पा न्यौपानेको अल्पायुमै दुःखद निधन भएको छ ।
पुष्पाले आफैंलाई आगो लगाएर आत्मदाह गरेकी छिन् । सायद उपरवालालाई समेत राम्रो मान्छे मात्र प्यारो लाग्छ ।
पुष्पाको परिवार व्यवसायिक परिवार हो । यिनी केल्मी नेपालकी अप्रेसन ईन्चार्जको रुपमा कार्यरत थिईन् । व्यवसायिक रुपमा सफल पुष्पालाई आईलागेको पारिवारिक झमेलाले संसारबाटै अन्ततः चँुडेर लग्यो ।
प्रकृति पनि कति निर्दयी । आइतवार साँझ ७ बजेको समयमा धुम्वराहीस्थित पिपलबोट नजिकमा एक घरको सामुन्नेमा पुष्पाको शरीर जलिरहेको अवस्थामा फेला परेको हो । पछि कीर्तिपुर अस्पतालमा उपचारका क्रममा पुष्पाको मृत्यु हुन पुगेको हो । पुष्पाले आफ्नो शरीरमा आफैले पेट्रोल छर्केर आत्मदाह गरेको प्रत्यक्षदर्शीहरु बताउँछन् ।
पुष्पाको सुधन संग्रौलासँग प्रेम बसी पछि दुवै परिवारको राजीखुसीमा विवाह हुने निर्णय भई केही समय अगाडी समेत ईङ्जमेन्ट भएको थियो । पछि केटा पक्षले एकतर्फी रुपमा विवाह हुन नसक्ने बताएपछि घटनाले यो डरलाग्दो रुप लियो । यसक्रममा पुष्पाले आत्मदाह गर्न पुगिन् । यस घटना हुनु केही समय अगाडी देखि नै पुष्पालाई सुधन लगायत सुधनको परिवारले निकै नै मानसिक यातना समेत दिने गरेको कुरा प्रहरीको अनुशन्धानको क्रममा खुलेको हो ।
मृतक न्यौपानेको परिवारले सुधनसहित उनका बुवा दिनेश, आमा बिन्दू र दाइ मधु विरुद्द आत्महत्या दुरुत्साहन गरेको कसूरमा किटानी जाहेरी दिएको छ । जाहेरीको आधारमा प्रहरीले आरोपी सवैलाई नियन्त्रणमा लिएको थियो । पछि म्याद थपका क्रममा अदालतले सुधनलाई मात्र थुनामा राखेर अनुशन्धान गर्ने अनुमती दिएको छ ।
