दिनेश खड्का
विराटनगर, माघ ९
विराटनगरमा विना याेजना जताततै पार्किङ निषेध गरिएकाे भन्दै महानगरकाे कदम विरुद्ध विराेधका स्वरहरु गुञ्जन थालेका छन् । कुनै मुल याेजना नबनाई जथाभावी नियम मात्र लाद्न खाेजेकाेमा विराटनगर बजारक्षेत्रका स्थानीय तथा व्यापारी आक्रान्त बनेका हुन् ।
स्थानीय, यँहाका व्यापारी र सराेकारवालहरुसँग कुनैपनि साल्लाह नगरी जताततै पार्किङ निषेध गरिनुलाई स्थानीयहरुले अराजकताकाे संज्ञा दिएका छन् । मुख्य बजार क्षेत्रमा कुनै याथाेचित विकल्प नदिई पार्किङ निषेध गरेसँगै व्यापार व्यवसायमा असर पुगेको भन्दै स्थानीय व्यवसायीहरु विराेधमा उत्रिएका छन् । पार्किङ नभएकै कारण ग्राहक आउन छाेडेपछि व्यापारीहरु त्यहाँबाट पलायन हुने अवस्था आएकाेले स्थानीय घरधनीहरु समेत चिन्तित बनेका छन् ।
शुक्रबार हुनमानदास रोड तथा जलजला राेडका व्यवसायीहरूले महानगरको कदमप्रति आपत्ति जनाउँदै प्रदर्शन समेत गरेका थिए। बजार क्षेत्रमा पहुँचयोग्य पार्किङस्थलको व्यवस्था नहुँदा यसले स्थानीय व्यापारमा ठुलाे असर पुर्याएकाे व्यसायीहरुकाे गुनासाे छ । उनीहरुले सडकको कुनै एक भागमा पार्किङ गर्न दिईनुपर्ने माग राख्दै महानगरलाई यथासिघ्र नियम सच्चयाउन चेतावनी समेत दिएका छन् । हनुमानदास रोड र रंगेली रोडलाई महानगरले बिहीबारबाट नो पार्किङ जोन बनाएको छ ।
यता महानगरले भने पार्किङकाे लागी स्थानहरु ताेकिसकेकाे बताएकाे छ । महानगरका अनुसार हुनमानदास रोड र रंगेली रोडका लागि कुल ४ स्थानमा निःशुल्क पार्किङको व्यवस्थापन मिलाइएको छ । पुरानो गुद्री भएको इ प्लट र बिजुली बजार अगाडिको ४ कठ्ठा जग्गालाई पार्किङ स्थल तोकिएको र ग्रीनक्रस हस्पिटल पछाडि र सञ्चेती चिया अगाडिको जग्गामा पार्किङ गर्ने व्यवस्था मिलाइएको महानगरले बताएकाे छ ।
