विराटनगर, जेठ १३
विराटनगर ५ चाँदनी चोकका स्थानीय वासिन्दा पारस थापा आजभोली ऋषिदेव वस्ती विराटनगर १२ मा भेटिन्छन् । उनी त्यहाँ पवित्र मन लिएर मात्र समाजसेवा गर्नकै लागि जान्छन् ।
हातमा कापी कलम साथमा लिएरनै जान्छन् । थापा त्यस ठाउँमा पुग्नासाथ स–साना नानीहरु खुशीले रमाउँछन् । यिनले पठनपाठनका लागि भनेर ती साना साना नानीहरुलाई शिक्षाको लागि पढ्ने सामाग्रीहरुको जोहो गर्दे आइरहेका छन् ।
यस्तो महान् कार्यका लागि यिनले आफ्नै खर्चबाट धानिरहेका छन् । स–साना नानीहरुको सरसफाईमा समेत विशेष ध्यान पुर्याउँदै हात धुने तरिका सिकाएका छन् । यसका लागि चाहिने आवश्यक साबुन पनि आफै किनिदिन्छन् ।
यस्ता सामाजिक कार्यहरुमा यिनको मन विगत १० बर्ष अगाडीदेखीनै आएको हो । आजभन्दा १० बर्ष अगाडीनै यिनले जव ऋषिदेव वस्ती हेरे । त्यो समयमानै त्यहाँ केही गर्छु भन्ने हुटहुटी आएकै थियो ।
विराटनगर १२ औषधी फ्याक्ट्री पछाडी रहेको यो ऋषिदेववस्तीमा रहेका करिब करिब २५ जना स–साना बालबालिकाको अवस्था एकदमै विपन्न अवस्थाकै रहेको छ । कसैको सहयोग विना यिनीहरु विद्यालय गएर पढ्ननै असंभव थियो ।
आज यहाँका बालबालिका २५ जनाले नै राम्ररी पढिरहेका छन् । उमेर ५ देखी १२ बर्षसम्मका नानीहरु अध्ययनरत छन् । विराटनगर १२ मै रहेको बखरी आधारभूत विद्यालयमा बालबालिकाहरु अहिले पढिरहेका छन् ।
