विराटनगर, पुष ६। गिरिजाप्रसाद कोइराला फाउण्डेशनले आफ्ना पूर्व अध्यक्ष सहित विभिन्न ४ जना ब्यक्तिहरुलाई सम्मान गरेको छ । फाउण्डेशन कोशी प्रदेशले शुक्रबार विराटनगरमा एक कार्यक्रमको आयोजना गर्दै “गिरिजाप्रसाद कोइराला विशेष सम्मान” बाट फाउण्डेशन कोशी प्रदेशका पूर्व अध्यक्ष शैलेन्द्र शिवाकोटी र फाउण्डेशन मोरङका संस्थापक पूर्व अध्यक्ष कौशल निरौलालाई सम्मान गरेको हो । शिवाकोटी अर्थशास्त्री हुन् भने निरौला पत्रकारिता क्षेत्रमा आवद्ध छन् ।
“क्रान्ति पुरुष गिरिजाप्रसाद कोइराला “नामक पुस्तकका लेखक मेदनीप्रसाद सेढाइ, र विराटनगर स्थित पारस हस्पिटलका अध्यक्ष शफिउर रहमानलाई समेत फाउण्डेशनले सम्मान गरेको छ । सेढाइद्वारा लिखित क्रान्ति पुरुष गिरिजाप्रसाद कोइराला नामक पुस्तक शुक्रबार विमोचन समेत गरिएको छ । विराटनगर महानगरका मेयर नागेश कोइरालाले पुस्तक विमोचन गर्नका साथै सम्मानित व्यक्तिहरुलाई प्रमाणपत्र तथा दोसल्ला ओढाएर शुभकामना प्रदान गरेका थिए । यस्तै कार्यक्रममा बोल्दै कोइरालाले फाउण्डेशनको स्थापना कालमा संस्थापकहरुले दिएको योगदानलाई स्मरण गर्दै गरिएको सम्मान आफैमा प्रशंसनीय रहेको बताए । उनले आगामी दिनहरुमा बर्तमान कार्यसमितिले अझ उदाहरणीय कार्य गर्न सक्ने भन्दै त्यतातर्फ अगाडि बढ्न पनि सुझाए । उनले क्रान्ति पुरुष गिरिजाप्रसाद कोइराला नामक पुस्तक आगामी पुस्ताका लागि गहकिलो दस्तावेज ठहरिने विश्वास व्यक्त गरे । कार्यक्रममा प्रा.डा. टुनराज भट्टराई ,कोशी प्रदेशका पूर्व कानूनमन्त्री लिलाबल्लभ अधिकारीले पुस्तकमाथी टिप्पणी गरेका थिए ।
