विराटनगर, पुष २९। ३०२औं पृथ्वी जयन्ती मनाउने क्रममा “राजतन्त्र जिन्दावाद, गणतन्त्र मुर्दावाद” काे नारा घन्किएकाे छ । बल्लभप्रसाद दाहाल अध्यक्ष रहेको एकीकृत राष्ट्रिय संघर्ष समिति मोरङले शुक्रबार विराटनगरमा पृथ्वी जयन्ती मनाउन निकालेकाे र्यालीमा साे नारा घन्किएकाे हाे । विराटनगरमा मात्र नभएर देशकाे विभिन्न स्थानहरुमा निकालिएकाे र्यालीहरुमा जनताहरु स्वतस्फुर्तरुपमा सहभागी भई राजतन्त्रकाे पक्षमा नारा लगाएकाे आयाेजक सदस्य पुष्पराज दाहालले जानकारी दिए ।
“हामीले राजतन्त्रकाे पक्षमा नारा लगाउने निधाे गरेका थियाैं, गणतन्त्रका विपक्षमा नारा लगाउने निधाे गरेका थिएनाैं” दाहाल भन्छन् “तर जनताहरु पम्प्लेटसहित स्वतस्फुर्त रुपमा ओर्लिएर गणतन्त्रकाे विपक्षमा नारा लगाउदा हामी आफै पनि छक्क पर्याै ।” गणतन्त्रले विकास गरेकाे चरम भ्रष्ट्रचार, दलालीपन, बेथिती, अनियमितता, विभेद, नातावाद र कृपावादका कारण जनताहरु आजित भएकाले जनताहरु आफै गणतन्त्रविरुद्ध ओर्लिन थालेकाे दाहालकाे बुझाई छ ।
राजसंस्था फर्काउन चैतदेखि दाहाल नेतृत्वकाे एकीकृत राष्ट्रिय संघर्ष समिति आन्दोलनमा जुटेकाे छ । शुक्रवारकाे र्यालीमा जनता स्वतस्फुर्तरुपमा सहभागी भई नारा लगाउदा कार्यक्रम सफल भएकाे आयाेजकले अनुभूती गरेकाे छ ।
