विराटनगर, फागुन २७
जिल्लामा हाल कार्यरत्त सादा पोशाकका प्रहरी हटाउन मोरङ प्रहरी प्रमुख उपरिक्षक (एसपी) नवराज कार्की सक्रिय भएर लागिपरे पनि यस कार्यमा उनी पुर्णरुपमा सफल हुनसकेका छैनन् ।
फागुनको पहिलो साता मोरङ प्रहरी प्रमुख भएर आएका एसपी कार्कीले नेतृत्व सम्हालेको केही दिनमै जिल्लाभर सादा पोशाकमा काम गरिरहेका प्रहरी (घुमुवा) हटाउने निर्णय गरे । लगतै उनले जिल्ला प्रहरी कार्यालय मोरङबाट वरिष्ठ नायब निरिक्षक राजेन्द्र कटवालको नेतृत्वमा खटिएको सादा पोशाकको टोलीलाई फिर्ता बोलाई दरबन्दी रहेको स्थानमा जान निर्देशन समेत दिए ।
एसपीको निर्देशनपछि कमाण्डर कटवाल सहित पाँच जाना प्रहरीलाई सादा पोशाकको जिम्माबारीबाट हटाएर दरबन्दी रहेको स्थानतर्फ युनिफर्ममा ड्यूटी गर्न समेत पठाईयो । पाँच जनालाई हटाईए पनि सोही टोलीको अन्य केही प्रहरीलाई अझैपनि असुलीधन्दा चलाउँदै आएको प्रहरी अधिकारीहरुले संरक्षण गरी गुपचुप रुपमा सादा पोशाकमै काममा खाटाईरहेको स्रोत बताउँछ । संगठनभित्रै घुमुवामार्फत पहिलेदेखीनै असुलीधन्दा चलाईरहेका त्यस्ता प्रहरी अधिकारीहरुले एसपीको आँखा छिचोलेर सादा पोशाकमा प्रहरी खटाउने गरेकाे बुझ्नमा आएको छ ।
हाईकमाण्डको निर्देशनपछि असुलीधन्दा चलाउने अधिकारीहरुले सादा पोशाक भनेरै प्रहरी खटाउन भने पाएका छैनन् । तर पनि त्यस्ता अधिकारीहरुले विभिन्न ड्युटिमा प्रहरी खटाएकोे फर्जि विवरण देखाएर उनीहरुलाई सादा पोशाकमार्फत असुली गर्न पठाउने गरेको बुझ्नमा आएको छ ।
एसपी कार्कीले अहोरात्र कसरत गर्दा पनि मारेङ माताहातकै प्रहरीका विभिन्न ईकाइहरुबाट खटिएका सादा पोशाक प्रहरी अहिलेसम्म हटेका छैनन् । यँहाको रंगली, वेलवारी र विराटनगरमा अहिले सादा पोशाकको प्रहरी छ्याप्छ्याप्ती डुलिरहेको छन् । जिल्ला प्रहरी कार्यलय मोरङमै पनि केहि प्रहरीहरुलाई अनसिन रुपमा सादा पोशाकमा खटाईएको बुझ्नमा आएको छ । एसपीको आँखा छलेर केही प्रहरी अधिकारीहरुले असुलीधन्दाको लागी त्यस्ता सादा पोशाकका प्रहरीलाई सक्रिय राखेको स्रोत बताउँछ ।
सादा पोशाकमार्फत चल्दै आएको असुलीधन्दालाई निमिट्यान्न पार्न एसपी कार्की लागिपरेपनि संगठनभित्रकै अधिकारीबाट उनले धोका पाईरहेका छन् । असुली धन्दामा रहेको सादा पोशाकका प्रहरीलाई निस्क्रिय पार्ने एसपीको मात्र योजना होईन, यो नवनियुक्त गृहमन्त्री रवि लामिछानेको पनि ईन्ट्रेष्ट हो । सोही कारण गृहमन्त्रालय र नेपाल प्रहरी पनि यही उद्देश्य अनुसार हिडेको बुझिएको छ । स्वयम् कोशी प्रदेशका प्रहरी प्रमुख नायब महानिरिक्षक चन्द्र कुबेर खापुङले पनि प्रहरीमा रहेको यस्ता विकृतीलाई चिर्न चाहेका छन् ।
तर गृहमन्त्री र प्रहरीका नेतृत्वहरुले चाँहदा–चाँहदै पनि सादा पोशाकको दुरुपयोग नियन्त्रण हुन भने सकेको छैन । किनभने कुनै पनि प्रहरीको ईकाइमा प्रहरीको शंख्या ठुलो हुने भएकाले को प्रहरी, कँहा, के गरिरहेको हुन्छन् त्यो नेतृत्वले थाहा पाउन सकिरहेको हुँदैन । त्यसैको फाईदा उठाउँदै ईकाइका केही अधिकारीहरुले सादा पोशाकका प्रहरीलाई संरक्षण गरि असुलीधन्दामा लगाईरहेका छन् ।
