विराटनगर, चैत १। विराटनगर मधुमाराकाे मुनलाइट गर्ल्स होस्टलकी सञ्चालक मधु रेग्मीलाई बुधबार प्रहरीले पक्राउ गरी अनुसन्धान सुरु गरेको छ । साेही हास्टेलमा बस्दै आएकाे नर्सिङ क्याम्पसमा बीएनएस र बीएस्सी नर्सिङमा अध्ययनरत छात्रामाथि दुव्यवहार गरेको आरोपमा मंगलबार साँझ रेग्मी पक्राउ परेकी हुन् ।
रेग्मीले छात्रालाई दुर्व्यवहार गरेकाे भिडियाे अहिले सामाजिक संजालमा भाईरल छ । हास्टेलका छात्राहरुले तिन महिनाको अग्रिम रकम दिन नमानेपछि रेग्मीले विद्यार्थीहरुलाई डरधम्की दिँदै हातपात गरेकाे भिडियाेमा प्रष्ट देखिन्छ। पिडित छात्राहरु विराटनगर नर्सिङ क्याम्पस पहिलो वर्षमा भर्ना भएका जुम्ला, पाल्पा र कन्चनपुर घर भएका विद्यार्थी हुन् । कलेजकै होस्टेलमा बस्नेहरुकाे लिस्टमा नाम परेपछि यी छात्राहरु हाल बस्दै आएका हाेस्टेल छाेड्ने तरखरमा थिए। त्यो कुरा थाहा पाएकी रेग्मीले चैतको पैसा पनि दिनुपर्ने दवाव दिईरहेकी थिइन् । आफुहरु चैतमा हाेस्टेल नबस्ने भन्दै विद्यार्थीले पैशा दिन नमाने पछी रेग्मीले छात्राहरुलाई हातपात गरेकी हुन् ।
हातापात भएकाे थाहपाएपछि मंगलबार रातिनै कलेज प्रशासनले विद्यार्थीकाे उद्धार गरी कलेजकाे हाेस्टेमा सारेकाे थियाे । लगतै बुधबार पीडित छात्राले उजुरी दिएपछि रेग्मी पक्राउ परेकी हुन् ।
