विराटनगर, असार २२ । महिला मात्रै सदस्य रहने नेपालकाे एक मात्र क्लब रोटरी डाउनटाउन विराटनगरकाे नेतृत्व मञ्जु अग्रवालले बुधवारदेखि सम्हालेकी छिन्।
बुधबार विराटनगरमा आयाेजित क्लबको पदस्थापन कार्यक्रममा रोटरीका विभिन्न पदाधिकारीहरूको उपस्थिति थियो। डिस्ट्रिक्ट गभर्नर राजेन्द्रमान शेरचनले नवनियुक्त अध्यक्षलाई सपथ ग्रहण गराएका थिए। कार्यक्रममा पूर्व गभर्नरहरू बासुदेव गोल्यान, सन्तोष रिजाल, संजय गिरी र पूर्वाञ्चल विश्वविद्यालयका उपकुलपति प्रा.डा. विजु थपलियालगायतको सहभागिता थियो।
नवनियुक्त अध्यक्ष मञ्जु अग्रवाल लामो समयदेखि क्लबमा सक्रिय रहेकी छिन्। क्लबकी पब्लिक रिलेसन अधिकारी मुक्ता ताेदीले आगामी एक वर्षमा विभिन्न सामाजिक कार्यहरू गर्ने यस क्लबकाे याेजना रहेकाे सुनाईन । विशेषगरी, शिक्षा, स्वास्थ्य र वातावरणको क्षेत्रमा केन्द्रित रहने ताेदीले बताइन्। साथै, सीमान्तकृत र विपन्न समुदायको हितमा अधिक काम गर्ने लक्ष्य राखेको उल्लेख गरिन्। यो क्लबले शिक्षा, स्वास्थ्य र वातावरणको क्षेत्रमा उल्लेखनीय काम गर्दै आएको छ र देशकै धेरै पुरस्कार प्राप्त गर्ने क्लबहरू मध्ये एक मानिन्छ। यस वर्ष मात्र क्लबले १६ वटा अवार्ड हासिल गरेको छ। कार्यक्रममा निवर्तमान अध्यक्ष कुसुम अग्रवाललाई बिदाइ गरिएको थियो।
