विराटनगर, साउन ७ । विराटनगर-९ स्थित ग्रिनल्याण्ड कलेजले कक्षा ११ मा भर्ना भएका विद्यार्थीहरूका लागि एक दिने अभिमुखीकरण कार्यक्रम सम्पन्न गरेको छ। कार्यक्रम विज्ञान र व्यवस्थापन संकायका नवप्रवेशी विद्यार्थीहरूलाई लक्षित गरी आयोजना गरिएको थियो।
कलेज प्रशासनले दिएको जानकारी अनुसार यस शैक्षिक सत्रकाे विज्ञान र व्यवस्थापन संकायमा उल्लेखनीय विद्यार्थी भर्ना भएका छन्। कार्यक्रममा कलेजका निर्देशकद्वय रविन्द्र घिमिरे र शिवनारायण यादवले संस्थाको शैक्षिक गतिविधि र भविष्यका योजनाहरूबारे जानकारी गराए। त्यसैगरी, निर्देशक विपी निरौला र शिक्षक भवानी दाहालले विद्यार्थीहरूलाई शुभकामना दिँदै सफल भविष्यको कामना गरे।
कार्यक्रममा नवप्रवेशी विद्यार्थीहरूले पनि आफ्ना अनुभव र अपेक्षाहरू साटासाट गरे। एसईईमा उत्कृष्ट नतिजा ल्याएका गरिमा तिम्सिना (जीपीए ३.९१), लिलाकान्त झा (३.९५), अस्मिता गोइत (३.७८), आरजु पौडेल (३.६४) र सुमित चौधरी (३.७३) ले आफ्ना विचारहरू राखे।
कलेज प्रशासनले यस्ता कार्यक्रमले नयाँ विद्यार्थीहरूलाई कलेजको वातावरणसँग परिचित गराउन र उनीहरूको आत्मविश्वास बढाउन मद्दत पुग्ने विश्वास व्यक्त गरेको छ।
