विराटनगर, साउन ११ । विराटनगरको रंगेली रोडमा अवस्थित मेरिल्याण्ड कलेजले व्यवस्थापन संकायमा गुणस्तरीय शिक्षा प्रदान गर्दै आएको छ। विहिबार कलेजले कक्षा ११ मा भर्ना भएका ६३७ भन्दा बढी नयाँ विद्यार्थीहरूलाई स्वागत गर्दै अभिमुखीकरण कार्यक्रम सम्पन्न गरेको छ।
पूर्वाञ्चल विश्वविद्यालयका उपकुलपति प्रा.डा. बिजुकुमार थपलियाले मेरिल्याण्डले व्यवस्थापन शिक्षामा पुर्याएको योगदानको प्रशंसा गर्दै रोजगारमुखी शिक्षाको महत्त्व बारे जोड दिए। कलेजका उपाध्यक्ष प्रा.डा. पि.के. झाले मेरिल्याण्डका विद्यार्थीहरू विश्वस्तरमा प्रतिस्पर्धी रहेको बताए।
कलेजका प्रिन्सिपल लक्ष्मण ढकालले सक्षम नेतृत्व, कुशल व्यवस्थापन र मेहनती शिक्षकहरूको टोलीले मेरिल्याण्डलाई उत्कृष्ट बनाएको उल्लेख गरे। उनले कलेजको उत्कृष्ट शैक्षिक वातावरण, कडा अनुशासन, समर्पित शिक्षक, पर्याप्त करियर विकासका अवसर र निरन्तर सुपरिवेक्षणलाई सफलताको कारण बताए।
कार्यक्रममा कलेजका निर्देशकहरूले सीप र संस्कारसहितको गुणस्तरीय शिक्षा प्रदान गरेकै कारण मेरिल्याण्ड विद्यार्थी र अभिभावकको रोजाइमा परेको बताए। यसैबीच, प्रवेश परीक्षामा उत्कृष्ट हुने दुई विद्यार्थीलाई सम्मान गरिएको थियो र कक्षा १२ का विद्यार्थीहरूले सांस्कृतिक प्रस्तुति दिएका थिए।
