सुनसरी, वैशाख ९ – प्रख्यात मास्टर शेफ सन्तोष साहले आफ्नो ‘मिथिला थाली’ र ‘जनकपुर फिस हाउस’ ब्रान्डलाई कोशी प्रदेशको राजधानी विराटनगरमा विस्तार गरेका छन्।
बुधबार विराटनगरको दुधफार्म नजिकै मिथिला थालीको पाँचौं शाखा उद्घाटन गर्दै शेफ साहले मिथिला संस्कृति र परम्परागत खानपानको संरक्षण तथा प्रवर्द्धन गर्ने आफ्नो प्रतिबद्धता बताएका छन्। एउटै छानामुनि दुवै ब्रान्ड सञ्चालनमा ल्याइएको यो शाखामा एकै पटक एक सय जना अतिथिलाई सेवा प्रदान गर्न सकिने व्यवस्था रहेको छ।
पत्रकार सम्मेलनमा बोल्दै मास्टर शेफ साहले भने, “आफूसँग भएकाे सिप र अनुभवलाई अहिले व्यावसायिक रूपमा विस्तार गरिरहेको छु। विराटनगरको यो शाखा मुलुकभरमा हाम्रो पाँचौं हो।” यसअघि उनले काठमाडौंको नक्साल (गैरीधारा) र गौशाला तथा ललितपुरको झम्सिखेलमा तीन शाखा र जनकपुरमा एक शाखा सञ्चालन गरिसकेका छन्।
विराटनगर शाखाको भविष्यका योजनाबारे जानकारी दिँदै साहले सेवा विस्तारपछि क्षमता बढाएर करिब २५० जनासम्म पुर्याउने लक्ष्य रहेको बताए। यस शाखामा मिथिला क्षेत्रका परम्परागत परिकारलाई प्राथमिकता दिइएको छ। ‘मिथिला थाली’मा तरुवा, तिलौरी, बिरिया, कडीबडी, चोखा, भात, घिउ रोटी र सलादलगायतका परिकार उपलब्ध छन्। ‘जनकपुर फिस हाउस’मा माछाका झण्डै १० प्रकारका परिकार उपलब्ध गराइने साहले जानकारी दिए। शाखाको सजावटमा मिथिला क्षेत्रको कला र संस्कृतिलाई प्रस्तुत गरिएको छ।
शेफ साह पछिल्लो समय अमेरिका, युरोप, न्युजिल्यान्ड, अष्ट्रेलिया र जापानसम्म नेपाली रैथाने परिकारको पप-अप शो प्रस्तुत गर्दै आएका छन्। तर, स्वदेशमा भने उनले ‘मिथिला थाली’ ब्रान्डको विस्तारमा विशेष जोड दिएका छन्।
