स्याङ्जा, १२ असोज । कालीगण्डकी नदीको बहाव घटेसँगै बेल्टारीस्थित १४४ मेगावाटको कालीगण्डकी ‘ए’ जलविद्युत् आयोजनाले आजैदेखि उत्पादन पुनः सुरु गर्ने भएको छ । चार दिनको लगातार वर्षाले नदीमा बाढी आएपछि आयोजना बन्द गरिएको थियो ।
केन्द्रका प्रमुख आत्मेस पौडेलका अनुसार सुरुङभित्रको हिलो सफा गरेर र पावर हाउसको अवस्था जाँचेर उत्पादन थालिनेछ । प्राविधिक टोलीले निरीक्षण गरिसकेको छ ।
बाढीका बेला मिर्मीस्थित बाँधका सबै ढोका खोलिएका थिए । वर्षाले सेतीबेणी बजार डुबानमा परेको छ, जहाँका २६ घरपरिवार नजिकैको विद्यालयमा राखिएका छन् । बाँधस्थलभन्दा तल स्याङ्जा–गुल्मी जोड्ने मोटरबाटो पुल आइतबार बिहान बाढीले बगायो ।
