काठमाडाैं, असोज २९। बडादशैंको सार्वजनिक बिदा सोमबार समाप्त भएसँगै मंगलबारदेखि शेयर बजार पुनः सञ्चालनमा आएको छ। तथापि, आश्विन शुक्लपक्ष त्रयोदशीको दिन आज पनि नवदुर्गाको प्रसादस्वरूप मान्यजनबाट टीका र जमरा लगाउने परम्परा कायम रहनेछ।
यो वर्षको दशैं चक्र असोज ३० गते बुधबार अखिल बलिपूर्तिसम्म र कात्तिक १ गते बिहीबार कोजाग्रत पूर्णिमासम्म रहने नेपाल पञ्चाङ्ग निर्णायक विकास समितिद्वारा स्वीकृत पात्रोमा उल्लेख गरिएको छ। कोजाग्रत पूर्णिमाको राति जाग्राम बसी महालक्ष्मीको पूजा गरिन्छ, जसपछि बडादशैं औपचारिक रूपमा समापन हुन्छ।
दशैं नवदुर्गाको प्रसाद र आशीर्वाद लिने मात्र नभई टाढा रहेका आफन्तहरूसँग भेटघाट गर्ने अवसर पनि हो। विजयादशमीदेखि आश्विन शुक्ल पूर्णिमासम्म मानिसहरू आफन्तको घरमा आशीर्वाद लिन जाने गर्छन्।
यसैबीच, सरकारी कार्यालयहरू पनि आजै मंगलबारदेखि खुलेका छन्।
