विराटनगर, मंसिर ११ ।
बिराटनगर महानगरपालिकाको आयोजनामा लैङ्गिक हिंसाविरुद्धको १६ दिने अन्तर्राष्ट्रिय अभियानको पहिलो दिन सोमबार विशेष कार्यक्रम सम्पन्न भएको छ। “हामी सबैको प्रतिबद्धता: लैङ्गिक हिंसाको अन्त्यका लागि एकता” भन्ने मूल नाराका साथ आयोजित कार्यक्रममा पञ्चेबाजासहितको बृहत् जनचेतनामूलक र्याली निकालिएको थियो।
गैसस महासंघ कोशी प्रदेश, मानव अधिकार सञ्जाल र संयुक्त राष्ट्रसंघीय जनसंख्या कोष (UNFPA) को समन्वयमा आयोजित र्यालीमा अपाङ्गता क्षेत्रका संघसंस्था, विद्यालय, राजनीतिक दल, नगर बाल सञ्जाल र विभिन्न संघसंस्थाका प्रतिनिधिहरूको उल्लेख्य सहभागिता रहेको थियो।
महानगर परिसरबाट सुरु भएको र्याली सिडियो कार्यालय, हस्पिटल चोक, जलजला रोड हुँदै महेन्द्र चोकमा पुगेर कोणसभामा परिणत भएको थियो। कार्यक्रममा महानगर प्रमुख नागेश कोइरालाले शुभकामना मन्तव्य राख्नुभएको थियो।
कार्यक्रमको समापनमा उपप्रमुख तथा न्यायिक समिति संयोजक शिल्पा निराला कार्कीले लैङ्गिक हिंसाबाट पुरुष पनि पीडित हुने गरेको उल्लेख गर्दै पीडितहरूलाई न्यायिक समितिमा सम्पर्क गर्न आग्रह गर्नुभयो। उहाँले न्यायिक समिति पीडितलाई न्याय दिन प्रतिबद्ध रहेको बताउनुभयो।
