विराटनगर, मसिर २७ । नेपाल प्रिमियर लिग (एनपीएल) को खेलमा पोखरा एभेन्जर्सले विराटनगर किंग्सलाई सुपर ओभरमा हराएको छ । एनपीएल इतिहासकै पहिलो सुपर ओभरमा पोखराले विजयी सुरुवात गरेको हो ।
निर्धारित २० ओभरको खेलमा दुवै टिमले समान १३९ रन बनाएपछि खेल सुपर ओभरमा पुगेको थियो । सुपर ओभरमा पहिले ब्याटिङ गरेको पोखराले रेइफरको विस्फोटक ब्याटिङमा २ छक्का र एक चौकाको मद्दतले १८ रन बनायो । रेइफरले निर्धारित खेलको अन्तिम बलमा छक्का प्रहार गरी खेललाई सुपर ओभरमा पुर्याएका थिए ।
१९ रनको लक्ष्य पछ्याएको विराटनगरले एक विकेट गुमाएर ५ रन मात्र बनाउन सक्यो । पोखराका लागि सुपर ओभरमा रेइफरले ब्याटिङ र बलिङ दुवैमा उत्कृष्ट प्रदर्शन गरे । उनको सर्वपक्षीय प्रदर्शनको बदौलत पोखराले रोमाञ्चक जित निकाल्न सफल भयो ।
