विराटनगर,२३ माघ । विराट गोल्डकप फुटबल प्रतियोगिता गराउने जिम्मेवारी पाएकै दिन उद्योगी नविन रिजालले शहीद रंगशालाको अनुगमन गरेका छन् । विराट गोल्डकप फुटबल ट्रष्टका अध्यक्ष किशोरबहादुर शाहीको अध्यक्षतामा मंगलबार बसेको बैठकले मोरङ उद्योग व्यापार संघका निवर्तमान अध्यक्ष रिजाललाई फुटबल प्रतियोगिता गराउने जिम्मेवारी दिएको छ ।
मंगलबार विराट गोल्डकप फुटबल प्रतियोगिताको संयोजकको जिम्मेवारी पाएका रिजालले खेलमैदानको तत्काल निरीक्षण गरेका थिए । अब मोरङ उद्योग व्यापार संघको टिमले निवर्तमान अध्यक्ष रिजाल संयोजक रहेको विराट गोल्डकप फुटबल प्रतियोगिता गराउने छ ।
संयोजक रिजालले २०८१ फागुन १९ देखि २८ गतेसम्म विराटनगर स्थित शहीद रंगशालामा दिवा खेल संगै फ्लड लाइटमा रात्रिकालीन फुटबल प्रतियोगिता आयोजना गर्ने गरी काम गर्ने बताए । अघिल्लो वर्ष विराट गोल्डकप फुटबल ट्रष्ट विराटनगर आफैले प्रतियोगिता आयोजना गर्दा भने घाटा बेहोरेको थियो । ट्रष्टले आर्थिक पाटोलाई पनि ढिलो गरि सार्वजनिक गरेको थियो ।
