विराटनगर, असार २१ । कोशी प्रदेश सरकारका उद्योग, कृषि तथा सहकारी मन्त्री डा. इस्राईल मन्सुरीको पहलमा सहकारी पीडित बचतकर्तालाई राहत दिने उद्देश्यले सञ्चालन गरिएको बचत फिर्ता अभियान प्रभावकारी रूपमा अघि बढिरहेको छ। प्रदेश सरकारका अनुसार हालसम्म कोशी प्रदेशभर ३ करोड ८४ लाख ६५ हजार ३२१ रुपैयाँ ७४ पैसा (रु. ३८,४६५,३२१.७४) बचतकर्ताको बैंक खातामा सिधै जम्मा गरिएको छ।
यस अभियानअन्तर्गत अम्बे कोशी बचत तथा ऋण सहकारी संस्थाका मागदाबी गरेका बचतकर्तालाई चरणबद्ध रूपमा रकम फिर्ता गरिएको जनाइएको छ। प्रदेश सरकारले ठूलो रकम जम्मा गरेका तथा साना बचतकर्तालाई समान रूपमा राहत पुग्ने गरी प्राथमिकताका आधारमा रकम वितरण गरिरहेको जनाएको छ। प्राप्त विवरणअनुसार दाबी गरेका पीडितको खातामै रकम सिधै पठाइएको छ, जसले बचतकर्तामा विश्वास र राहतको अनुभूति गराएको बताइएको छ।
सहकारी व्यवस्थापन तथा सुधार अभियानअन्तर्गत अम्बे कोशी बचत तथा ऋण सहकारी संस्थामा १०१ वटा ऋण फुकुवा, २३० जना ऋणीबाट ऋण असुली तथा १६७ वटा बचत मिलानमार्फत ऋण समायोजन सम्पन्न भएको छ। यस प्रक्रियाबाट रु. १५ करोड ३७ लाख ४० हजार नगद ऋण असुली भएको छ भने बचत मिलानमार्फत रु. २ करोड ९० लाख ९८ हजार ६४ रुपैयाँ ७४ पैसा बराबरको ऋण समायोजन गरिएको तथ्यांक सार्वजनिक गरिएको छ।
त्यसैगरी, मागदाबी गरेका बचतकर्तामध्ये पहिलो चरणमा १७३ जनालाई प्रतिव्यक्ति २० हजार रुपैयाँका दरले राहत उपलब्ध गराइएको छ। बाँकी बचतकर्तालाई पनि दाबीको अवस्था र उपलब्ध स्रोतका आधारमा चरणबद्ध रूपमा रकम फिर्ता गर्ने कार्य जारी रहेको जनाइएको छ।
मन्त्री डा. इस्राईल मन्सुरीले सहकारी क्षेत्रप्रति जनविश्वास पुनःस्थापित गर्न, बचतकर्ताको हित संरक्षण गर्न तथा समस्याग्रस्त सहकारीहरूको व्यवस्थापनलाई व्यवस्थित बनाउन प्रदेश सरकारले निरन्तर पहल गरिरहेको बताएका छन्। उनका अनुसार सहकारी क्षेत्रमा देखिएका समस्या समाधान गर्दै पीडित बचतकर्तालाई न्याय दिलाउनु प्रदेश सरकारको प्रमुख प्राथमिकतामध्ये एक हो।
प्रदेश सरकारका अनुसार सहकारी सुधार, वित्तीय अनुशासन कायम गर्ने, बचतकर्ताको हित संरक्षण गर्ने तथा समस्याग्रस्त सहकारीको व्यवस्थापनलाई थप प्रभावकारी बनाउने उद्देश्यले आगामी दिनमा पनि बचत फिर्ता अभियानलाई निरन्तरता दिइनेछ। साथै, सहकारी पीडितलाई क्रमिक रूपमा राहत उपलब्ध गराउने प्रतिबद्धता सरकारले दोहोर्याएको छ।
